Վրաստանը պատրաստվածության որոշակի մակարդակ ունի՝ արդարադատության, ազատության և անվտանգության ոլորտում օրենսդրության կատարման համար,- ասված է Եվրահանձնաժողովի պատրաստած զեկույցում Վրաստանի՝ Եվրամիությանն անդամակցելու հայտադիմումի վերաբերյալ։
«Երկիրն ունի մի քանի ռազմավարություն, հատկապես ահաբեկչության և միգրացիայի հետ կապված։ Որոշ ոլորտների, հատկապես օտարերկրացիներին և ապաստանի հարցերին վերաբերող օրենսդրությունը, հիմնականում համահունչ է ԵՄ օրենսդրությանը, սակայն ինստիտուցիոնալ համագործակցությունն ու համակարգումը թույլ են: Արդյունքում, կատարումը երբեմն անբավարար է լինում»,- ասվում է փաստաթղթում։
Ինչ վերաբերում է պետական գնումներին, ապա նշվում է, որ Վրաստանում պետական գնումների ոլորտում պատրաստվածության որոշակի մակարդակ կա։
«Դրան հետևում է այն, որ պետք է համապատասխանեցնի իր իրավական դաշտը ԵՄ օրենսդրությանը, ներառյալ կոմունալ ոլորտում կապալառուներին, և հետագայում համապատասխանեցնի իր օրենսդրությունը պաշտպանության և անվտանգության ոլորտներում գնումների կոնցեսիոն դիրեկտիվին», – ասվում է զեկույցում:
Փաստաթղթում նշվում է, որ ԵՄ կանոնները պահանջում են, որ ԵՄ անդամ երկրները կարողանան վիճակագրություն վարել մասնագիտական անկախության, անկողմնակալության, հուսալիության, թափանցիկության և գաղտնիության հիման վրա։
Բացի այդ, զեկույցում նշվում է, որ ԵՄ կանոնները նպատակ ունեն ապահովելու արդար մրցակցություն և կայունություն ֆինանսական հաստատությունների, մասնավորապես՝ բանկային, ապահովագրական, լրացուցիչ կենսաթոշակների, ներդրումային ծառայությունների և արժեթղթերի շուկաների միջև: Դրանք ներառում են այդ հաստատությունների լիազորման, գործունեության և վերահսկողության կանոնները:
Փաստաթղթում խոսվում է նաև թվային փոխակերպման և լրատվամիջոցների մասին ու ընդգծվում է, որ ԵՄ-ն աջակցում է էլեկտրոնային շուկայի, կապի, էլեկտրոնային առևտրի և տեսալսողական ծառայությունների անխափան գործունեությանը։ Կանոնակարգերը պաշտպանում են սպառողներին և աջակցում են ժամանակակից ծառայությունների համընդհանուր մատչելիությանը:
«Վրաստանն ունի պատրաստվածության որոշակի մակարդակ տեղեկատվական հասարակության և լրատվամիջոցների ոլորտում: Նա որոշակի քայլեր է ձեռնարկել իր օրենսդրությունը ԵՄ օրենսդրությանը համապատասխանեցնելու ուղղությամբ։ Վրաստանն ունի թվային քաղաքականության մի քանի ռազմավարություն, սակայն անհրաժեշտ է ջանքեր գործադրել՝ դրանք համապատասխանեցնելու Եվրոպական հանձնաժողովի «Եվրոպայի թվային ապագայի ուրվագծմանը» և «Թվային կողմնացույցին»: Էլեկտրոնային հաղորդակցության եվրոպական օրենսգրքի սպեկտրի դրույթների իրականացումը պարզ չէ: Առկա է համընդհանուր ծառայությունների ռեժիմի բացակայություն, և, համապատասխանաբար, Էլեկտրոնային հաղորդակցության եվրոպական օրենսգրքով ունիվերսալ ծառայությունների իրականացումը դեռևս հնարավոր չէ։ Համացանցի բաց մուտքի վերաբերյալ կոնկրետ իրավական ակտեր կամ կանոններ չկան: Ըստ երևույթին, առաջընթաց կա ԵՄ տեսալսողական մեդիա ծառայությունների դիրեկտիվի հետ համապատասխանության ուղղությամբ», – նշվում է զեկույցում։
