Հունվարի 27-ին «Վրաստանի երիտասարդական միության» անդամները պիկետ են անցկացրել Վրաստանի հանրային հեռարձակողի մոտ՝ բողոքելով Վրաստանում գործող հիմնական լրատվականների լռության դեմ:
Դեռևս դեկտեմբերի 26-ին, «Րաֆֆի» ուսանողության միության անդամները Վրաստանում գործող 20 խոշոր լրատվամիջոցներին էին հանձնել Արցախի մասին պատմական գրքեր, ՄԱԿ-ի տասնյակ ներկայացուցիչների և այլ առաջատար երկրների պատասխաններն Ադրբեջանին, Վրաստանի հայ համայնքի բաց նամակը, որը պարունակում էր տեղեկատվություն Ադրբեջանի կողմից Արցախում 120 000 մարդկանց շրջափակման մասին։
Պիկետն անցկացվեց հանրային առաջին հեռուստաալիքի դիմաց, որն ունի նաև հայալեզու բաժին՝ Ռամիլիա Ալիևայի գլխավորությամբ: Պիկետի մասնակիցները իրենց հետ ունեին ցուցանակներ, որոնց վրա գրված էր Արցախի շրջափակման, սննդի և դեղորայքի պակասության և, իհարկե, հանրության լռության մասին:
«Րաֆֆի» ուսանողական միության վարչության նախագահ Վրեժ Հարությունյանը Jnews-ի հետ զրույցում նշեց.
«Հույս ունենք, որ այսօրվա անցկացված պիկետը կազդի լրատվամիջոցների վրա և մնացածն արդեն ժամանակը ցույց կտա: Մենք ապագայում ևս ըստ անհրաժեշտության՝ անցկացնելու ենք տարբեր միջոցառումներ: Բողոքի գլխավոր պատճառն այն է, որ բացառությամբ մի քանի լրատվականների, երկրի հիմնական լրատվամիջոցները գերադասում են լռել և ոչ լիարժեք տեղեկության տրամադրել հանրությանը»:
Հավելենք նաև, որ մի քանի օր առաջ հայ երիտասարդները Թբիլիսիի տարբեր կամուրջների վրա Արցախի շրջափակման հետ կապված պաստառներ են տեղադրել՝ այդպիսով գրավելով հանրության ուշադրությունը:
