Ձյան տեսքով տեղումների և բքի պատճառով վրաց-ռուսական սահման տանող ճանապարհին դժվարացել է երթևեկությունը: Ճանապարհը բաց է միայն թեթև մարդատար ավտոմեքենաների համար։
Վրաց-ռուսական սահման տանող ճանապարհին մարդատար ավտոմեքենաների տեղաշարժն իրականացվում է սովորական ռեժիմով, տրանսպորտի այլ տեսակների համար ճանապարհը փակ է։ Այս մասին Jnews-ին հայտնեցին Վրաստանի Տարածաշրջանային զարգացման նախարարության Ճանապարհային վարչությունից։
Մցխեթա-Ստեփանծմինդա-Լարս ավտոճանապարհի Գուդաուրի-Կոբի հատվածում սահմանափակումները մասամբ հանվել են, ճանապարհները մաքրում են ձնից, մաքրման աշխատանքները շարունակվում են։ Ձյան և մերկասառույցի պատճառով կցորդով և կիսակցորդով տրանսպորտային միջոցների համար երթևեկությունն արգելված է։
Շրջակա միջավայրի ազգային գործակալության տվյալներով՝ Գուդաուրի-Կոբի հատվածում երթեւեկությունն իրականացվում է առանց կանգառի՝ միայն հակաավալանշային թունելներով։
