Վրաստանի տարբեր պետական բուհերի մի քանի տասնյակ ուսանողներ պահանջում են, որ պետությունն սկսի ուսանողական հանրակացարաններ կառուցել, սուբսիդիաներ հատկացնել բնակարանների վարձակալության համար, ինչպես նաև կոչ են անում փոխել Իվանե Ջավախիշվիլիի անվան Թբիլիսիի պետական համալսարանի ռեկտորի ընտրության կարգը։
«Այսօր խորհրդարանում տեղի է ունենում ֆինանսաբյուջետային հանձնաժողովի նիստ։ Ընդ որում, 2023 թվականի բյուջեի նախագծով նախատեսված չէ ուսանողական հանրակացարանների կառուցում, իսկ բնակարանների համար պետությունը հատկացնում է ընդամենը 29 700 լարի, թեև 2021 թվականին հատկացվել է 39 338 լարի, իսկ 2022 թվականին՝ 33 800 լարի։ Այսինքն՝ տարեցտարի ֆինանսավորումը նվազում է, չնայած բնակարանային ճգնաժամը խորանում է, իսկ վարձով բնակարանների վարձավճարը ամսից ամիս ավելանում է։
Ներկայումս միայն Թբիլիսիի պետական համալսարանն ունի հանրակացարան, որը կարող է ընդունել ընդամենը 600 ուսանող։ Սա նշանակում է, որ հազարավոր ուսանողներ մնացել են անօթևան և չեն կարողանում բնակարան վարձակալել»,- ասում են ցուցարարները։
Մայիսյան ուսանողական շարժման ներկայացուցիչ Սաբա Կերկաձեն լրագրողներին հաստատել է, որ ակցիայի մի քանի ներկայացուցիչներ ցանկացել են մասնակցել խորհրդարանական հանձնաժողովի նիստին՝ իրենց դիրքորոշումն ամրագրելու համար, սակայն նրանց անցաթուղթ չի տրվել։
ԿերԿաձեն ասել է, որ վերջերս բողոքի շարժման ներկայացուցիչները հանդիպել են Թբիլիսիի պետական համալսարանի ռեկտորի նոր պաշտոնակատար Ջաբա Սամուշիայի հետ և նրա հետ քննարկել ուսանողական հանրակացարանների խնդիրները։ Նրա խոսքով՝ Սամուշիան խոստացել է, որ համալսարանը կփորձի ուղիներ գտնել խնդրի լուծման համար։ Ուսանողական շարժումը, սակայն, նշում է, որ նման մոտեցումն իրենց համար անընդունելի է և պահանջում են համակարգված մոտեցում Վրաստանի բոլոր պետական բուհերի համար հանրակացարաններ տրամադրելու հարցում։
