Հասարակություն Ախալքալաք

Ախալքալաքում վարորդ է տուգանվել մեքենայից աղբը նետելու համար. վիճակագրություն

---

Ախալքալաքում 2022 թվականի ապրիլ-հունիսին, այսպես կոչված «խելացի տեսախցիկները» արձանագրել են տրանսպորտային միջոցների վարորդների կողմից 4 234 իրավախախտում: Արդյունքում նրանք վճարել են 158 240 լարիի չափով տուգանք։ Jnews-ը վերլուծել է Ներքին գործերի նախարարության 2022 թվականի երկրորդ եռամսյակում տեսագրությունների տուգանքների վերաբերյալ տվյալները:

Ճնշող մեծամասնությունը՝ 4 233 դեպք, կապված է վարչական իրավախախտումների հետ, իսկ 1 դեպք՝ շրջակա միջավայրի աղտոտման։ Այսպիսով, Ախալքալաքում մեկ հոգի տուգանվել է «Թափոնների կառավարման օրենսգրքի» 31-րդ հոդվածի 3-րդ մասով՝ ավտոմեքենայից աղբ նետելու համար։ Նա տուգանվել է 250 լարիով, սակայն օրինախախտը մինչև 10 օրվա ընթացքում տուգանքը վճարելով՝ օգտվել է 20% զեղչից և վճարել է 200 լարի։

1. Վարորդներից շատերը տուգանվել են տարեկան տեխզննումը չանցնելու համար՝ 2614 մարդ, որից 2600-ը ֆիզիկական անձինք են, 14-ը՝ իրավաբանական:
2. 1407 մարդ տուգանվել է սխալ վայրում կայանելու համար, այսինքն՝ «Կանգառ չկա» և «Առանց կայանելու» նշանները խախտելու համար:
3. 173 մարդ տուգանվել է ամրագոտի չկապելու համար:
4. 20 վարորդի տեսախցիկները ֆիքսել են հեռախոսով խոսելիս և յուրաքանչյուրը տուգանվել է 30 լարիով:
5. 18 հոգի խախտել են ճանապարհային կանոնները կամ մեքենան վարել կարմիր լույսի տակ, կամ մեքենայով մտել են արգելված վայր, կամ վազանց են կատարել սխալ տեղում, ինչի համար տուգանվել են 50 լարիով։ Նրանցից 9-ը վճարել են տուգանքը 10 օրից շուտ և օգտվել 20% զեղչից:
6. Մեկ այլ վարորդ տուգանվել է ճանապարհային երթեւեկության կանոնները խախտելու համար, ինչը ստեղծել է վթարային իրավիճակ, տուգանվել է 200 լարիով, սակայն վճարելով 10 օրվա ընթացքում՝ բյուջե է մուտքագրել 160 լարի:

Հետաքրքիր է նշել, որ 2022 թվականի հունվար-մարտին Ախալքալաքում գրանցվել է ընդամենը 2 խախտում։