Թբիլիսիում ավարտվեց Ադրբեջանի և Հայաստանի արտգործնախարարներ Ջեյհուն Բայրամովի և Արարատ Միրզոյանի հանդիպումը։
Սա Բաքվի և Երևանի միջև հարաբերությունների կարգավորման նպատակով, Ադրբեջանի և Հայաստանի արտգործնախարարների առաջին հանդիպումն է:
Բանակցությունները տեղի են ունեցել Radisson Blu Iveria հյուրանոցում։
Վրաստանի արտգործնախարար Իլիա Դարչիաշվիլին վստահություն է հայտնել, որ Վրաստանում բանակցությունները տարածաշրջանում կամրապնդեն խաղաղությունն ու կայունությունը:
«Թբիլիսին միշտ եղել է այն վայրը, որտեղ շատ կարևոր որոշումներ են կայացվել»,- ասել է Դարչիաշվիլին։
«Այսօր ես ոչինչ չեմ կարող ասել ձևաչափի շարունակության մասին, կարևորն այն է, որ այսօր մեզ հաջողվեց համատեղ երկխոսություն սկսել հարևան երկրների արտգործնախարարների և գործընկերների միջև, ինչպես և նախկինում, սա ևս անշուշտ կնպաստի այս գործընթացի շարունակությանը»,- նշել է Վրաստանի արտգործնախարարը։
Դարչիաշվիլին հիշեցրել է, որ Վրաստանի վարչապետ Իրակլի Ղարիբաշվիլին դեռ 2021 թվականին ՄԱԿ-ի ամբիոնից հայտարարել էր Հարավային Կովկասում խաղաղ հարևանության նախաձեռնության մասին և առաջարկել եղբայրական պետություններին միջնորդական հարթակ ստեղծել Թբիլիսիում։
Նախարարի խոսքով՝ այսօրվա օրն «այս գործընթացի տրամաբանական շարունակությունն է, երբ մեր հարեւանները ժամանել են Վրաստան և երկխոսություն սկսել այն կարևոր հարցերի շուրջ, որոնք ունեն երկկողմ հարաբերություններում»։
«Ես շատ հպարտ եմ, որ Թբիլիսին Ադրբեջանի և Հայաստանի արտգործնախարարներ Ջեյհուն Բայրամովի և Արարատ Միրզոյանի հանդիպման վայրն է։ Վստահ եղեք, որ տարածաշրջանում խաղաղության և կայունության հաստատմանն ուղղված մեր համատեղ ջանքերը արդյունք կտան»,- Twitter-ում գրել է Իլիա Դարչիաշվիլին։
Ադրբեջանի նախագահը վերջին շրջանում հանդես է գալիս ադրբեջանա-հայկական հարաբերությունների կարգավորման հարցերում ԵԱՀԿ Մինսկի խմբի ձևաչափից հրաժարվելու և այդ հարցի շուրջ բանակցությունները Թբիլիսի տեղափոխելու նախաձեռնությամբ։
Մեկ ամիս առաջ հունիսի 16-ին ելույթ ունենալով Բաքվի միջազգային համաժողովում Իլհամ Ալիևն ասել էր, որ «ԵԱՀԿ Մինսկի խմբի աշխատանքը ոչ մի արդյունք չի տվել, այս կառույցը անգործունակ է, և այն վերակենդանացնելու փորձերը հակաարդյունավետ են»։
Ալիևը նշել է, որ Բաքվին անհրաժեշտ է եռակողմ երկխոսություն սկսել Երևանի և Թբիլիսիի հետ՝ տարածաշրջանում խաղաղ համակեցություն հաստատելու համար՝ հաշվի առնելով անդրսահմանային գետերի և տրանսպորտային հանգույցների հարցը։
Ադրբեջանի նախագահն ընդգծել է, որ Բաքուն ձգտում է խաղաղության պայմանագիր ստորագրել և Հարավային Կովկասի տարածաշրջանում զարգացման խաղաղ փուլ սկսել։
Միևնույն ժամանակ Ալիևը հայտարարել է, որ Թբիլիսին աջակցում է Բաքվի և Երևանի միջև հարաբերությունների կարգավորման եռակողմ բանակցություններին՝ Վրաստանի, Ադրբեջանի և Հայաստանի արտգործնախարարների հանդիպման ձևաչափով։
