Ախալքալաքցիների կողմից սիրված Բավրա գյուղի կամրջի մոտակայքում՝ Տավշանկայում, որը տեղաբնակները «Բրդնոց» են անվանում, ճահճանում է։ Տեղի իշխանությունները որպես պատճառ անվանում են հաճախակի տեղումները:
Վրաստանի Միավորված ջրամատակարարման Ախալքալաքի սպասարկման կենտրոնում, որտեղ Jnews-ը դիմել էր՝ պարզելու, թե արդյո՞ք այս տարածքով ջրային հաղորդակցություններ են անցնում, մեզ հայտնեցին, որ ջրատար խողովակներն ավելի մոտ են ճանապարհին և որևէ կապ չեն կարող ունենալ այս տեղանքի ճահճացման հետ։ Սպասարկման կենտրոնում ճահճացման հնարավոր պատճառ են անվանում կամ նոր աղբյուրի հայտնվելը, կամ առատ տեղումները։
Ախալքալաքի քաղաքապետարանի Էկոլոգիայի վարչության բնապահպանական ծառայության բաժնի պետ Ռամազ Խուցիշվիլին ասաց, որ քաղաքապետարանը տեղյակ է այս խնդրին, և եթե խնդիրը խորանա, ապա որպես խնդրի լուծում նշվում է ջրահեռացման համակարգի տեղադրումը։
«Ջրահեռացման համակարգ է պետք կառուցել: Այս տարի շատ անձրև ու ձյուն տեղաց, կչորանա: Ամեն տարի էլ նման բան լինում է: Այնտեղ դեռևս վտանգ չկա: Եթե կարիք լինի, դրենաժ կտեղադրենք: Սա բնություն է, և այստեղ ոչ մի վատ բան չկա»,- մեկնաբանեց Ռամազ Խուցիշվիլին։
Հիշեցնենք, որ Jnews-ը Ախալքալաքի մտահոգ բնակիչներից ստացել էր լուսանկարներ՝ հաղորդագրությամբ, որ Տավշանկայի առաջին տաղավարի հարակից տարածքը՝ ջրի և ցեխի պատճառով, անանցանելի է դարձել։ Ականատեսները պնդում են, որ 2 շաբաթ առաջ այս տարածքում ճահճացման հետքեր չեն եղել։
