Երեկ՝ հունվարի 25-ին, Ախալքալաքի քաղաքապետարանի սակրեբուլոյում տեղի ունեցավ երեք հանձնաժողովների այս տարվա առաջին նիստերը։ Ֆինանսավարկային և բյուջետային հանձնաժողովի, Տարածքային պլանավորման հանձնաժողովի և մանդատների, ընթացակարգերի, իրավական հարցերի և էթիկայի հանձնաժողովի նիստերը:
Ֆինանսաբյուջետային հանձնաժողովը քննարկեց 2022 թվականի բյուջեի փոփոխությունները։ Բյուջեի փոփոխությունները կազմում են 3 910 882,01 լարի։ Քննարկեցին ընկերություններին վերադարձվելիք երաշխիքային գումարները։ Խոսքը վերաբերվում էր նախորդ տարի մունիցիպալիտետում տեղական բյուջեից կատարված աշխատանքներին։
Քննարկեցին պետական միջոցներով իրականացված ծրագրերից խնայողությունները, որոնք անցած տարի իրականացվել են մունիցիպալիտետում։
Բացի այդ, քննարկվեցին տեղական բյուջեից ընթացիկ տարում իրականացվելիք ծրագրերը և դրանց համար հատկացված միջոցները, ինչպես նաև փոխանցվող գումարները, որոնք նախորդ տարի տարբեր պատճառներով չեն վճարվել կամ չեն օգտագործվել։
Տերիտորիալ-տարածքային պլանավորման հանձնաժողովի նիստում քննարկվեցին 2022 թվականի ծրագրերը։ Առաջնահերթությունները, ըստ որոնց ընտրվում են ենթակառուցվածքային աշխատանքները իրականացման, առաջացրին պատգամավորների դժգոհությունը։
«Միասնական ազգային շարժում» կուսակցության պատգամավոր Շիրվան Շիրինյանն առաջարկեց նոր աշխատանքներ ընտրելուց առաջ ծանոթանալ մունիցիպալիտետի զարգացման ծրագրին, որտեղ կան բազմաթիվ անհրաժեշտ աշխատանքներ, որոնց նախագծերը վաղուց պատրաստ են։
«Մաջադիա գյուղի ճանապարհի ասֆալտապատումը 5 տարի առաջ ներառվել է մունիցիպալիտետի զարգացման ծրագրում, նախագիծը պատրաստ է, գումարը հայտնի է, բայց չգիտես ինչու նոր աշխատանքներն իրականացվում են, իսկ հները՝ մնում»,- ասաց պատգամավոր Շիրվան Շիրինյանը։
Հանձնաժողովների նիստերի ժամանակ քննարկված հարցերը ուղարկվեցին բյուրոյի քննարկման, որտեղից էլ, իրենց հերթին, ուղարկեցին Շրջանային ժողովի քննարկմանը։
Բյուրոյի նիստում առաջարկվեց քննարկել մունիցիպալիտետի ոչ կոմերցիոն, շահ չհետապնդող իրավաբանական կազմակերպությունների միավորման հարցը։ Սա առաջարկել է Պետական աուդիտը, 2020 թվականին մունիցիպալիտետի աշխատանքի աուդիտորական ստուգումից հետո, նրանք առաջարկել են միավորել կազմակերպությունները՝ աննպատակահարմար համարելով մունիցիպալիտետում 14 կազմակերպություն ունենալը։
