Russian      Georgian

Հայաստանում մշակվում է Վրաստանում հայոց լեզվի ուսուցիչների ատեստավորման համար նախատեսված հարցաշար: Միևնույն ժամանակ, ակնկալվում է, որ ՀՀ-ում վրաց լեզու կուսուցանվի: Այս մասին ՀՀ ազգային ժողովում կառավարության ներկայացուցիչների հարց ու պատասխանի ժամանակ ասել է ՀՀ ԿԳՄՍ նախարար Վահրամ Դումանյանը: Այս մասին գրում է Aliq.ge-ին:

Ազգային ժողովի պատգամավոր Շիրակ Թորոսյանն անդրադառնալով Վրաստանում հայոց լեզվի և գրականության ուսուցիչների ատեստավորման խնդրին, նախարար Վահրամ Դումանյանին հարցրել է, թե ի՞նչ փուլում է քննական հարցաշարի տրամադրումը։

«Մեր ենթակայության տակ գտնվող Գնահատման և թեսթավորման ազգային կենտրոնն արդեն ձեռնամուխ է եղել հայոց լեզու և գրականություն առարկայի ուսուցիչների 100 հարցանոց հարցաշարի մշակմանը։ Եվ այն պատրաստ կլինի երեք ամսվա ընթացքում», — պատասխանել է Դումանյանը։

Դումանյանը, միևնույն ժամանակ, ընդգծել է, որ Հայաստանում մշակում են վրաց լեզվի չափորոշիչներ և ծրագրեր, և ակնկալվում է, որ սեպտեմբերից Հայաստանում վրացերեն կդասավանդվի։

Նշենք, որ Վրաստանում արդեն մի քանի տարի է ընթանում է ուսուցիչների վերապատրաստման ծրագիրը, ըստ որի առարկայական և մասնագիտական հմտություններ հաղթահարած ուսուցիչները ստանում են կոչում՝ հետևաբար նաև բարձր աշխատավարձ։ Այս ամենից, սակայն, զրկված են էթնիկ փոքրամասնության ներկայացուցիչների մայրենի լեզու և գրականություն առարկաների ուսուցիչները։

Այս խնդրին Վրաստանում բազմիցս անդրադարձել են ինչպես ադրբեջանական դպրոցի ներկայացուցիչները, այնպես էլ հայկական, ինչպես նաև բարձրաստիճան այրեր։

Հայաստանի և Վրաստանի կրթական ոլորտի ներկայացուցիչները վերջերս հուշագիր են ստորագրել, ըստ որի, վրաստանյան ներկայացուցիչները կկազմակերպեն որակավորման քննություններ հայերենի ուսուցիչների համար՝ հայաստանյան կոլեգաների օգնությամբ։