Ամերիկայի Միացյալ Նահանգների պաշտպանական անվտանգության համագործակցության գործակալությունը հավանություն է տվել Վրաստանին 30 մլն դոլարի «Ջավելին» հրթիռների և սարքավորումների հնարավոր վաճառքին: Այդ մասին այսօր Կոնգրեսին հայտնել են գործակալությունից:
Գործակալության տվյալներով, Վրաստանի կառավարությունը խնդրել է գնել «Javelin» հակատանկային կառավարվող 82 հրթիռներ և 46 ուղղորդիչ արձակող կայանքներ:
«Նշված վաճառքը կամրապնդի ԱՄՆ արտաքին քաղաքականությունն ու ազգային անվտանգությունը` բարելավելով Վրաստանի անվտանգությունը:
Վրաստանը հեշտությամբ կկարողանա համատեղել այս համակարգը իր զինված ուժերին:
Վրաստանը ռազմավարական գործընկեր է և զգալի ներդրում ունի տարածաշրջանի անվտանգության և կայունության ապահովման գործում: «Javelin» համակարգը կօգնի Վրաստանին ամրապնդել պաշտպանունակությունը և պաշտպանել իր ինքնիշխանությունն ու տարածքային ամբողջականությունը: Այս սարքավորումների առաջարկվող վաճառքն ու աջակցությունը չեն փոխի տարածաշրջանում հիմնական ռազմական հավասարակշռությունը», – ասվում է Պաշտպանական անվտանգության համագործակցության գործակալության հաղորդագրության մեջ:
