Ներքին գործերի նախարարության Սամցխե-Ջավախքի ոստիկանության բաժանմունքի հետախուզության բաժնի աշխատակիցները, իրականացված օպերատիվ-հետախուզական գործողությունների արդյունքում, 1997 թվականին ծնված Օ.Պ.-ին ձերբակալել են ծանրացուցիչ հանգամանքներում կատարված դիտավորյալ սպանության մեղադրանքով:
Հանցագործությունը նախատեսում է առավելագույն պատիժ` 16-ից 20 տարի ժամկետով կամ ցմահ ազատազրկում:
Քննությունը պարզել է, որ Նինոծմինդայի մունիցիպալիտետի Սաթխա գյուղում մի քանի անձանց միջև վեճ է տեղի ունեցել, որի ժամանակ էլ մեղադրյալ Օ.Պ.-ն հրազենային վնասվածքներ է հասցրել համագյուղացիներ՝ 1988 թվականին ծնված Ս․Ա․-ին, 2001 թվականին ծնված Ս․Բ.-ին և 1990 թվականին ծնված Վ․Բ․-ին։
Նույն կոնֆլիկտի ընթացքում սառը զենքով մարմնական վնասվածքներ է ստացել 1996-ին ծնված Մ.Ի.-ն։
Ս․Ա․-ն ստացած վնասվածքի հետևանքով, մինչ հիվանդանոց տեղափոխելը մահացել է, իսկ մնացած 3 անձանց բժիշկները ցուցաբերել են համապատասխան բժշկական օգնություն:
Մեղադրյալ Օ.Պ. թաքնվել է դեպքի վայրից, սակայն իրավապահները շուտով պարզել են նրա գտնվելու վայրը և դեպքից մի քանի ժամ անց ձերբակալել են:
Իրականացվում են օպերատիվ-հետախուզական և քննչական գործողություններ՝ դեպքի հետ կապված այլ հանգամանքներ պարզելու և նշված փաստի հետ կապված այլ անձանց հայտնաբերելու և կալանավորելու ուղղությամբ:
Դիտավորյալ սպանության փաստը, որը կատարվել է ծանրացուցիչ հանգամանքներում, հետաքննվում է Վրաստանի քրեական օրենսգրքի 109-րդ հոդվածի 3-րդ մասով:
