Ախալքալաքի մունիցիպալիտետի Սակրեբուլոն, վերանայման նպատակով, քաղաքապետարան է վերադարձրել 2020 թվականի բյուջեի փոփոխությունների փաթեթը, նշելով, որ Ամանորյա տոների ծախսերի կետում անհրաժեշտ է կրճատել ծախսերը:

Այսօր՝ նոյեմբերի 25-ին, Ախալքալաքի մունիցիպալիտետի Սակրեբուլոյում տեղի ունեցավ Բյուրոյի նիստ, այնուհետև՝ ժողով: Այլ հարցերի հետ մեկտեղ քննարկվեց նաև 2020 թվականի բյուջեում փոփոխությունների փաթեթը: Սակրեբուլոյի պատգամավորները քննադատեցին այն կետը, որում Ախալքալաքի մունիցիպալիտետի քաղաքապետարանի մշակույթի, կրթության, սպորտի և երիտասարդության հարցերի վարչությունը 14 100 լարի գումար է պահանջում քաղաքի ամանորյա լուսավորության, քաղցրավենիքի և հրավառության ձեռքբերման համար:

Ախալքալաքի քաղաքապետարանը Նոր տարվա զարդարանքի համար պահանջում է 14100 լարի

Պատգամավորները չհամաձայնվեցին գումար հատկացնել և փոփոխությունների փաթեթը հետ ուղարկեցին վերանայման, առաջարկելով գրել միայն ամենաանհրաժեշտ ծախսերը:

«Սակրեբուլոյի ֆինանսա-բյուջետային հանձնաժողովը երեկ քննարկեց 2020 թվականի բյուջեի փոփոխությունների փաթեթը, պատգամավորների մոտ հարցեր առաջացան միայն քաղաքի ամանորյա լուսավորություն գնելու կետի մասով: Այս տարի բյուջեում ունենք պակասորդ, շատ աշխատանքների համար միջոցներ չբավարարեցին, շատ աշխատանքներ ունենք, որոնք պիտի իրականացնենք: Մեր բյուջեն շատ փոքր է, և, հաշվի առնելով համավարակն ու առկա իրավիճակը, առաջարկում ենք կրճատել գումարը և գրել միայն ամենաանհրաժեշտը», – ասաց Ֆինանսա-բյուջետային հանձնաժողովի նախագահ Սեդա Մելքումյանը:

Մասնավորապես, քննարկվեց այն, որ ավելի նպատակահարմար կլինի կրճատել հրավառության, լուսավորության, քաղցրավենիքի և խաղալիքների գնման ծախսերը և թողնել միայն տոնածառի տեղադրման և ապամոնտաժման ծախսերը: