Ախալքալաքի մունիցիպալիտետի Ֆիլիպովկա գյուղի բնակիչները հույս ունեն, որ հոկտեմբերի 31-ին կայանալիք խորհրդարանական ընտրություններից հետո իրենց գյուղում իրավիճակը դեպի լավը կփոխվի:
Ֆիլիպովկա գյուղում ապրում է շուրջ 10-12 ընտանիք: Գյուղատնտեսությունը եկամտի հիմնական աղբյուրն է: Այս տարի գյուղացիները լրացուցիչ խնդիրներ ունեն՝ կապված այն բանի հետ, որ չեն կարողացել մեկնել արտագնա աշխատանքների: Հիմնականում գյուղացիները մեկնում էին աշխատելու Ռուսաստան։ Նրանք հույս ունեն, որ ընտրություններից հետո իրավիճակը կփոխվի, և, հնարավոր է, սահմանները բացվեն:
Սերոբ Մհերյանի խոսքով, այս տարի նա ցանկացել է մեկնել արտագնա աշխատանքի, բայց չի կարողացել, քանի որ սահմանները փակ էին: Ըստ նրա՝ նախընտրական քարոզչության ընթացքում թեկնածուները խոստացել են օգնել գյուղացիներին՝ ինչով կարող են:
«Հուսով եմ, որ ընտրություններից հետո իրավիճակը կփոխվի, և միգուցե սահմանը բացվի: Ես անպայման կգնամ ընտրությունների, մենք ընտանիքում արդեն որոշել ենք, թե ում ենք ընտրելու», – ասում է նա:
Ախալքալաքի մունիցիպալիտետի Ֆիլիպովկա գյուղում հիմնականում տեղեկացված են առաջիկա ընտրությունների մասին:
Բրատիսլավ Իգիթխանյան