Հոկտեմբերի 8-ին, Լեռնային Ղարաբաղի Պաշտպանական բանակը հայտնում է, որ մայոր Հովհաննես Այվազյանին, ով արմատներով Ջավախքից է, ներկայացրել է «Մարտական խաչ» 2-րդ աստիճանի շքանշանի՝ թշնամական 3 տանկ ոչնչացնելու համար:

Մայոր Հովհաննես Այվազյանը արմատներով Ախալքալաքի շրջանի Գումբուրդո գյուղից է, ով այս օրերին մասնակցում է Արցախում ընթացող ռազմական գործողություններին:

«Մարտական խաչ» 2-րդ աստիճանի շքանշանի է ներկայացվել նաև ավագ լեյտենանտ Միհրան Ավդալյանը, ով մասնակցել է մարտական դիրքերից մեկը ետ վերցնելու գործողությանն ու, հայտնաբերելով շրջափակման մեջ ընկած 7 զինծառայողներին, միջոցներ է ձեռնարկել նրանց շրջափակումից հանելու համար:

Փոխգնդապետ Արման Կոստանյանը, չնայած ծանր մարտական իրադրությանը, չի նահանջել, կազմակերպել է ստորաբաժանման գրագետ պաշտպանությունը, ետ մղել հակառակորդի բազմաթիվ գրոհներն ու, պատճառելով վերջինիս մեծաթիվ կորուստներ, ապահովել գումարտակի պաշտպանության կայունությունը, ինչի համար էլ ներկայացվել է «Մարտական խաչ»-ի ասպետության 1-ին աստիճանի:

Նույն կարգի շքանշանի է ներկայացվել նաև փոխգնդապետ Արսեն Խաչատրյանը՝ նույն կերպ ապահովելով պաշտպանության կայունությունն ու հսկայական կորուստներ պատճառելով թշնամական զորքերին: