Երկուշաբթի՝ հունիսի 8-ին, Վրաստանում սկսվում է սահմանափակումների վերացման հերթական փուլը, որը սահմանվել է կորոնավիրուսի տարածման սպառնալիքի պատճառով:

Կառավարության որոշմամբ՝ վաղվանից վերսկվսում է.

– միջքաղաքային ուղևորափոխադրումները,
– փակ տիպի ռեստորանների, սրճարանների և բարերի աշխատանքը,
– հյուրանոցների աշխատանքը,
– տարադրամի փոխանակման կետերի աշխատանքը:

Ուղևորատար երկաթուղային երթևեկության արգելքը դեռևս շարունակում է ուժի մեջ մնալ: Ենթադրաբար, այս սահմանափակումը կհանվի մեկ շաբաթից՝ հունիսի 15-ից:

Ինչ վերաբերում է հյուրանոցներին, ապա իրենց աշխատանքը կկարողանան վերսկսել միայն այն հաստատությունները, որոնք կարողացել են կատարել բոլոր պահանջները, անցնել ստուգումը և Առողջապահության նախարարությունից թույլտվություն են ստացել:

Անվտանգության միջոցների պահպանման դեպքում՝ բացվում են նաև սննդի օբյեկտները: Հիմնական պայմանը սոցիալական հեռավորության ապահովումն է: Վեցից ավելի հյուրեր չեն կարող տեղավորվել մեկ սեղանի շուրջ: Դրա հետ մեկտեղ, աթոռները պետք է տեղադրվեն միմյանցից առնվազն 1 մետր հեռավորության վրա: Վրաստանի առողջապահության նախարարությունը վաղուց հրապարակել էր ռեստորանների և սրճարանների համար հրահանգները:

Միջքաղաքային ավտոբուսների և միկրոավտոբուսների համար հանձնարարականները նման են հասարակական տրանսպորտի համար հրահանգներին: Մասնավորապես, ինչպես ուղևորները, այնպես էլ վարորդները պետք է կրեն բժշկական դիմակներ:

Վրաստանում կորոնավիրուսի տարածման պատճառով՝ մարտի 21-ից մայիսի 23-ն արտակարգ դրություն էր գործում: Նույնիսկ դրա վերացումից հետո մնացին այն սահմանափակումները, որոնք նպատակ ունեն նվազեցնելու բնակչության շարժունակությունը:

Հունիսի 8-ից հետո կշարունակվի գործել ավելի քան տասը հոգու հավաքի արգելքը՝ ավանդական սոցիալական միջոցառումներ անցկացնելու նպատակով` հարսանիքներ, հոգեհանգիստ, տարեդարձ և այլն: Բազմամարդ վայրերում պաշտպանիչ դիմակներ կրելը պարտադիր է: Դեռ փակ են մնում խաղատները, գիշերային ակումբները, մարզասրահները, լողավազանները, ինչպես նաև բոլոր թանգարանային հաստատությունները և թատրոնները:

Հունիսի 15-ից Վրաստանում կվերսկսի ներքին տուրիզմը: Զուգահեռաբար ակնկալվում է բացօթյա որոշ թանգարանների և արգելոց-թանգարանների վերաբացումը: Հուլիսի 1-ից Վրաստանում կվերսկսվեն միջազգային ավիաչվերթները, ինչպես նաև Վրաստանն իր սահմանները կբացի օտարերկրյա զբոսաշրջիկների համար: