Վրաստանի վարչապետի պաշտոնում առաջադրվել է ՆԳՆ ղեկավար Գեորգի Գախարիան: Այդ մասին հայտարարել է «Վրացական երազանք-ժողովրդավարական Վրաստան» իշխող կուսակցության նախագահ Բիձինա Իվանիշվիլին:
«Այսօր առավոտյան տեղի է ունեցել «Վրացական երազանք-ժողովրդավարական Վրաստան» կուսակցության քաղխորհրդի նիստը: Ես որպես կուսակցության նախագահ վարչապետի պաշտոնի համար առաջադրել եմ Գեորգի Գախարիայի թեկնածությունը»,-ասել է Իվանիշվիլին1
Կուսակցության հիմնադիր և ղեկավար Բիձինա Իվանիշվիլին ներկայացրել է նոր թեկնածուին՝ Վրաստանի ներքին գործերի նախարար Գիորգի Գախարիային: Իվանիշվիլիի խոսքով, վրաց հասարակությունը շատ լավ է ճանաչում Գախարիային և նա կարդարացնի հույսերը:
Գիորգի Գախարիան 2013 թվականից աշխատում էր, որպես բիզնեսօմբուդսման, ապա էկոնոմիկայի նախարար: 2017 թվականի նոյեմբերից Գախարիան նշանակվել է ՆԳ նախարար:
Գիորգի Գախարիան վերջին ամիսների ընթացքում ամենաքննադատված քաղաքական դեմքերից է Վրաստանում: 2019 թվականի հունիսին ակցիան ցրելու պատճառով, որի հետևանքով տասնյակ մարդիկ վիրավորվեցին, հասարակության մի մասն առ այսօր պահանջում է նրա հրաժարականը:
Հիշեցնենք, որ երեկ հրաժարական է տվել շուրջ մեկ տարի վարչապետի պաշտոնը զբաղեցնող Մամուկա Բախտաձեն։
Վրաստանի վարչապետի հրաժարական տալու դեպքում, կառավարությունը շարունակում է պարտականությունների իրականացումը մինչև նոր վարչապետի նշանակումը:
Վրաստանի նոր Սահմանադրության համաձայն, վարչապետի հրաժարականից կամ լիազորություններից այլ ճանապարհով զրկվելուց հետո 2 շաբաթվա ընթացքում խորհրդարանն իր վստահությունն է հայտնում խորհրդարանի ընտրություններում լավագույն արդյունքն ունեցող քաղաքական կուսակցության կողմից առաջադրված վարչապետի թեկնածուին։ Այնուհետև առաջադրված թեկնածուն ներկայացնում է կառավարության կազմն ու ծրագիրը։
Վստահություն ստանալու համար հարկավոր է խորհրդարանի ողջ կազմի մեծամասնության աջակցությունը:
Սրա հետ մեկտեղ, եթե խորհրդարանը կառավարության սահմանած ժամկետում վստահություն չի հայտնում, Վրաստանի նախագահը համապատասխան ժամկետի ավարտից ոչ ավելի շուտ քան երկու, ոչ ավելի ուշ քան երեք շաբաթ անց, խորհրդարանը ցրում է ու նշանակում արտահերթ ընտրություններ:
