Այսօրվա դրությամբ Ախալքալաքի մունիցիպալիտետի 10 դպրոցներում հայտարարվել է 20 թափուր աշխատատեղ5 տարբեր առարկաների ուսուցիչների հաստիքների համար:

Ըստ Ախալքալաքի Կրթական ռեսուրս կենտրոնի, մեր շրջանում կենսաթոշակային տարիքի 165 ուսուցիչ ցանկություն է հայտնել դադարեցնել ուսուցչական գործունեությունը, սակայն նրանց թիվը վերջնական չէ:

Այն բանից հետո, երբ ուսուցիչները ցանկություն հայտնեցին դադարեցնել մանկավարժական գործնեությունը, Ախալքալաքի մունիցիպալիտետի դպրոցներում հայտնվեցին նոր թափուր աշխատատեղեր:

Մունիցիպալիտետի 10 դպրոցներում հայտարարվել են հետևյալ մասնագետների թափուր աշխատատեղեր:

Այսօրվա դրությամբ, Բուղաշեն գյուղի դպրոցում կա 5 թափուր աշխատատեղ՝ անգլերեն, վրացերեն և ռուսերեն լեզուների, ինչպես նաև նկարչության և քիմիայի ուսուցիչների:

Օլավերդ գյուղի դպրոցում կա թափուր աշխատատեղ՝ նկարչության, ֆիզկուլտուրայի և տարրական դասարանների ուսուցիչների:

Հոկամ գյուղի թիվ 1 դպրոցում կան թափուր աշխատատեղ՝ անգլերենի, մաթեմատիկայի և տարրական դասարանների ուսուցիչների:

Բարալեթ գյուղի թիվ 1 դպրոցում կա թափուր աշխատատեղ՝ ռուսաց լեզվի և նկարչության ուսուցիչների:

Ախալքալաքի №3 դպրոցում թափուր աղխատատեղ կա տարրական դասարանների և հատուկ ուսուցչի համար:

Գոման, Կիրովական, Բալխո և Դադեշ գյուղերի դպրոցները հայտարարել են անգլերենի, երաժշտության, կենսաբանության և քաղաքացիական իրավունքի ուսուցիչների թափուր աշխատատեղ:

Իսկ Մյասնիկյան գյուղի դպրոցը հայտարարել է թափուր աշխատատեղ դպրոցի տնօրենի պաշտոնում:

Ընդհանուր առմամբ, Ախալքալաքի շրջանի 10 դպրոցում այսօրվա դրությամբ հայտարարված է 20 թափուր աշխատատեղ:

Հարկ է նշել, որ Վրաստանի դպրոցներում աշխատող 64 329 ուսուցիչներից 16 406-ը կենսաթոշակային տարիքի են:

Ըստ Վրաստանի կրթության փոխնախարար Իրինա Աբուլաձեի, այս փուլում գրանցվել են կենսաթոշակային տարիքի մինչև 6000 ուսուցիչ:

Ըստ նրա՝ մանկավարժները, որոնք ինքնակամ որոշել են հեռանալ դպրոցից, երկու տարվա աշխատավարձը կստանան ընթացիկ տարվա հոկտեմբերի սկզբին: Նրանք ամբողջ կյանքի ընթացքում կունենան մանկավարժի բժշկական ապահովագրական փաթեթ:

«Հիշեցնենք, որ 2019 թվականին իրականացված համապատասխան սահմանադրական փոփոխությունների հիման վրա, 2022 թվականին Վրաստանի բյուջեի մեկ չորրորդը կծախսվի կրթության ոլորտի վրա: Չնայած արդեն հիմա կա կրթության ֆինանսավորման աստիճանական սիստեմատիկ աճ, ինչն ակնհայտորեն ենթադրում է ավագ, առաջատար և մենթոր ուսուցիչների աշխատավարձերի բարձրացում»,- նշել է Իրինա Աբուլաձեն:

Հատկանշական է, որ կենսաթոշակային տարիքի ուսուցիչների դրամական ֆոնդը, ովքեր մտադիր են դրամական պարգևավճար ստանալ, հասնում է մի քանի տասնյակ միլիոն լարիի:

Նշենք, որ Ախալքալաքի Կրթական ռեսուրս-կենտրոնի համաձայն՝ մունիցիպալիտետի դպրոցներում դասավանդում է 1437 ուսուցիչ, որոնցից 260-ը կենսաթոշակային տարիքի են:

Ախալքալաքի մունիցիպալիտետի դպրոցներում ուսուցչի թափուր աշխատատեղերի համար հավակնող թեկնածուները կարող են հայտ ներկայացնել մինչև օգոստոսի 31-ը ներառյալ:

Բրատիսլավ Իգիթխանյան