«Հանուն Վրաստանի» կուսակցությունը X սոցիալական ցանցում հայտարարություն է հրապարակել Գիորգի Գախարիայի վրա հարձակման վերաբերյալ։
Ինչպես ասվում է հայտարարության մեջ, «Հանուն Վրաստանի» կուսակցությունը պահանջում է հարձակման փաստով անհապաղ և մանրակրկիտ հետաքննություն սկսել։
«Բաթումիում «Հանուն Վրաստանի» կուսակցության առաջնորդ, նախկին վարչապետ Գիորգի Գախարիան հարձակման է ենթարկվել մի խմբի կողմից, որը կազմակերպել է Իվանիշվիլիի ռեժիմը։ Գիորգի Գախարիան Բաթումիում էր՝ մասնակցելու մեր կուսակցության երիտասարդական կազմակերպության անարդարացիորեն կալանավորված անդամների դատավարությանը, երբ տեղի ունեցավ այս սարսափելի բռնությունը: «Հանուն Վրաստանի կուսակցությունը» պահանջում է անհապաղ և մանրակրկիտ հետաքննություն Իվանիշվիլիի ռեժիմի կողմից կազմակերպված բռնի հարձակման վերաբերյալ և կոչ է անում պատասխանատվության ենթարկել բոլոր մեղավորներին։ Քաղաքական դրդապատճառներով այս հարձակումը ընդդիմությանը վախեցնելու և այլախոհությունը ճնշելու ակնհայտ փորձ է: Նման գործողությունները երբեք չեն լռեցնի Վրաստանի ժողովրդավարական և եվրոպական ապագայի համար պայքարող ձայները»,- ասվում է կուսակցության հայտարարության մեջ։
Բաթումիում հարձակման է ենթարկվել Գիորգի Գախարիան։ ՆԳՆ-ն հարձակման փաստով հետաքննություն է սկսել Քրեական օրենսգրքի 126-րդ հոդվածով, որը վերաբերում է բռնությանը։
