Վրաստանի պաշտպանության նախարարությունը կունենա արյան սեփական բանկը, և համապատասխան փոփոխություններ կկատարվեն «Մարդու արյան և դրա բաղադրիչների որակի և անվտանգության մասին» օրենքում։ Պաշտպանության նախարարությանը կից արյան բանկ բացելու կառավարության մտադրությունները նշված են 2024 թվականի գործողությունների ծրագրում, որը գործադիր իշխանությունը ներկայացրել է խորհրդարանին։
Տեղեկության համաձայն՝ Վրաստանում ստեղծվելու է արյան երեք հաստատություն, որոնք պատասխանատու կլինեն արյան հավաքման, մշակման, փորձարկման, պահպանման և բաշխման համար։
«Օրենքի շրջանակներում արյան մասնավոր բանկերը կփոխարինվեն արյան կենտրոնական հաստատությամբ, որը կստեղծի Վրաստանի կառավարությունը՝ պետության անունից։ Արյան կենտրոնական հիմնարկը կենթարկվի առողջապահության նախարարությանը։ 2025 թվականի հուլիսի 1-ից Վրաստանում կարգելվի արյուն հանձնել դրամական փոխհատուցման դիմաց»,- պարզաբանվում է հաղորդագրության մեջ։
Կառավարության տվյալներով՝ արյան բանկը կկառավարի Վրաստանի պաշտպանության նախարարության Գիորգի Աբրամիշվիլիի անվան ռազմական հոսպիտալը։
