Օտարերկրացին կամ քաղաքացիություն չունեցող անձը, որի՝ Վրաստանում օրինական գտնվելու ժամկետը լրացել է, այլևս չի կարող կասեցնել Վրաստանում գտնվելու կանոնները խախտելու համար նշանակված պատժամիջոցների կատարումը՝ համապատասխան տուգանքը բողոքարկելու ժամանակահատվածում։ «Վարչական իրավախախտումների օրենսգրքում» կատարված փոփոխությունն ուժի մեջ է մտել օգոստոսի 31-ին։

Խոսքը «Վարչական իրավախախտումների օրենսգրքի» 191-րդ հոդվածի մասին է, որը վերաբերում է Վրաստանում օտարերկրացիների և քաղաքացիություն չունեցող անձանց գտնվելու կանոնների, ինչպես նաև Վրաստանի տարածքով տարանցիկ տեղաշարժի խախտումներին։

Գործող կանոնների համաձայն՝ եթե օտարերկրացին Վրաստանում մնում է իր օրինական գտնվելու ժամկետի լրանալուց հետո, նրա նկատմամբ տուգանք է նշանակվում։ Տուգանքի չափը կախված է նրանից, թե որքան ժամանակով է նա գերազանցել երկրում գտնվելու՝ օրենքով սահմանված ժամկետը։

Մասնավորապես, եթե գտնվելու ժամկետը գերազանցվել է մինչև 3 ամիս, տուգանքը կազմում է 1000 լարի, իսկ օտարերկրացուն 6 ամսով արգելվում է մուտք գործել Վրաստան։

Եթե Վրաստանում օրինական գտնվելու ժամկետը գերազանցվել է 3 ամսից ավելի, բայց 1 տարուց պակաս, տուգանքը կազմում է 2000 լարի, իսկ Վրաստան մուտքն արգելվում է 2 տարով։

Եթե օտարերկրացին Վրաստանում գտնվելու՝ օրենքով սահմանված ժամկետը գերազանցում է ավելի քան 1 տարով, նրան սպառնում է 3000 լարի տուգանք, իսկ Վրաստան մուտքը կարգելվի 3 տարով։

Նույն հոդվածի համաձայն՝ Վրաստանի տարածքով տարանցիկ տեղաշարժի կանոնների խախտումը նախատեսում է 500 լարիանոց տուգանք։

191-րդ հոդվածը նաև պատասխանատվություն է նախատեսում Վրաստանում գրանցված ֆիզիկական կամ իրավաբանական անձանց համար, որոնք օտարերկրացուն հրավիրում են Վրաստան, ծառայություններ են մատուցում կամ օգտվում են նրա ծառայություններից՝ խախտելով Վրաստանում բնակության, աշխատանքի և ուսման իրավունքի ստացման սահմանված կանոնները։ Նման դեպքերում նախատեսվում է նախազգուշացում կամ 2000 լարի տուգանք։

Կարևոր փոփոխությունը վերաբերում է նշանակված տուգանքը բողոքարկելու կանոններին։

Փոփոխությունների համաձայն՝ 191-րդ հոդվածի համաձայն օրենքի խախտման համար կայացված որոշումը կամ նշանակված տուգանքը բողոքարկելն այլևս չի կասեցնում դրա կատարումը։ Հետևաբար, բողոքարկման փաստն այլևս չի ազատում անձին նշանակված պատժի կրումից։

Բացի այդ, 191-րդ հոդվածի առաջին չորս կետերով նախատեսված տուգանքը չվճարելու դեպքում համապատասխան տեղեկությունը պետք է տրամադրվի Վրաստանի արտաքին գործերի և ներքին գործերի նախարարությունների համապատասխան մարմիններին։ Մինչև տուգանքի վճարումը անձին չի տրամադրվի վրացական վիզա և Վրաստան մուտք գործելու թույլտվություն։

Նույն փոփոխությունը կիրառվում է նաև «Վարչական իրավախախտումների օրենսգրքի» 116-րդ հոդվածով նախատեսված դեպքերի նկատմամբ։ 116-րդ հոդվածը, մասնավորապես, վերաբերում է տրանսպորտային միջոցը ալկոհոլային հարբածության վիճակում վարելուն։ Այս դեպքում տրանսպորտային միջոց վարելու իրավունքի կասեցման մասին որոշումը բողոքարկելն այլևս չի կասեցնում դրա կատարումը։