Վրաստանի խորհրդարանը երրորդ ընթերցմամբ և արագացված կարգով քննարկել և 76 կողմ ձայնով աջակցել է «Կուտակային կենսաթոշակի մասին» օրենքում փոփոխություններին, որոնք նախատեսում են գործատուներին ազատել Կենսաթոշակային հիմնադրամի կողմից սահմանված տուգանքներից։
Հարցը նիստում ներկայացրել է խորհրդարանի ֆինանսաբյուջետային հարցերի հանձնաժողովի նախագահ Պաատա Կվիզինաձեն։
Օրենսդրական փաթեթը նախատեսում է գործատուներին պայմանականորեն ազատել վարչական պատասխանատվությունից՝ Կենսաթոշակային հիմնադրամի կողմից 2025 թվականի մայիսի 1-ից հետո սահմանված տուգանքներից, պայմանով, որ համապատասխան գործատուները մինչև 2026 թվականի դեկտեմբերի 31-ը ամբողջությամբ կկատարեն կենսաթոշակային վճարումները և կվճարեն հաշվարկված տույժերը։
Բացի այդ, տուգանքի չափը նվազեցվում է․ առաջին և կրկնակի խախտման համար համապատասխանաբար 500 և 1000 լարիի փոխարեն տուգանքը կկազմի 300 լարի։
Օրինագիծը նախատեսում է կենսաթոշակային վճարումներ կատարելու պարտավորության խախտման հետ կապված հարաբերությունների նոր կարգավորում։
Մասնավորապես, օրինագծով սահմանվում է «չստացված օգուտ» հասկացությունը, ինչպես նաև կենսաթոշակային վճարում կատարելու պարտավորության խախտման հայտնաբերման, գործատուի նկատմամբ տուգանքի սահմանման և մասնակցին չստացված օգուտի հաշվարկման, ինչպես նաև դրանց կատարման և բողոքարկման կարգը։ Բացի այդ, նախատեսվում է չկատարված կենսաթոշակային վճարումների և չստացված օգուտի տարաժամկետ՝ փուլային վճարման հնարավորություն։
Միաժամանակ ստեղծվում է Կենսաթոշակային հիմնադրամի վեճերի քննության ծառայություն, ինչպես նաև սահմանվում է վերջինիս կողմից բողոքների քննության և որոշումների ընդունման կարգը։
