Վրաստանի կառավարությունը կարող է պատրաստել ավտոմեքենաների սեփականատերերի քաղաքացիական պատասխանատվության պարտադիր ապահովագրության մասին օրինագիծ։ Այս մասին վկայում են օրենսդիր մարմնի առաջիկա նստաշրջանի վերաբերյալ իշխանությունների ծրագրերը։
Փաստաթղթում նշվում է, որ այս միջոցառման անհրաժեշտությունը պայմանավորված է ավտոմեքենաների և ճանապարհատրանսպորտային պատահարների թվի աճով։ Դրանց հետևանքով տուժածները կարող են ծանր ֆինանսական բեռ կրել՝ աշխատանքի դադարեցման, ստացած վնասվածքների և բուժման ծախսերի պատճառով։
Իշխանություններն առաջարկում են ավտոմեքենաների սեփականատերերին պարտավորեցնել ձեռք բերել ԱՊՊԱ և կարծում են, որ նման պրակտիկան կնպաստի երկրում ապահովագրական մշակույթի զարգացմանը, այս ոլորտում քաղաքացիների իրազեկվածության բարձրացմանը և ապահովագրական հատվածի նկատմամբ վստահության աճին։
Առայժմ պարզ չէ՝ արդյոք օրինագիծն ընդհանրապես կներկայացվի, իսկ եթե ներկայացվի, ապա ինչ տեսքով այն կընդունվի։
Կառավարության ծրագրերի վերաբերյալ նույն փաստաթղթում առաջարկվել է նաև պարզեցնել «ՏՏ ոլորտի» կացության իրավունք ստանալու գործընթացը և սահմանափակել անչափահասների կողմից էլեկտրական սկուտերներով երթևեկելը։
