Վրաստանում խորհրդարանական ընտրությունները տեղի կունենան հոկտեմբերի 26-ին։ Jnews-ը հետևում է Ախալքալաքում ակտիվ կուսակցությունների նախընտրական քարոզարշավի ընթացքին։ Հոկտեմբերի 21-ին մենք այցելել էինք «Փոփոխությունների համար» կոալիցիայի նախընտրական քարոզարշավին Ախալքալաքի մունիցիպալիտետի Բուռնաշեթ գյուղում:
«Փոփոխությունների համար» կոալիցիան (№4) դա «Ախալի» (ՄԱՇ-ից անջատված կուսակցության մի մասը), «Դրոա» և «Գիրչի՝ ավելի ազատություն» կուսակցությունների միավորումն է։ Ախալքալաքում այն ներկայացնում է Մելիք Ռաիսյանը։ Նա կոալիցիայի կուսակցական ցուցակում ներկայացված է 46 համարով։
Հանդիպումը Բուռնաշեթ գյուղի բնակիչների հետ տեղի ունեցավ գյուղի ակումբում։ Դրան մասնակցում էր մոտ 20 մարդ։ Մելիք Ռաիսյանը հանդես եկավ քարոզչական խոսքով, որից հետո ներկաներից մեկը հարց հղեց նրան:
«Մեր ազգային արժանապատվությունը, մեր լեզուն, հավատքը պահպանելու համար մենք պետք է դառնանք Վրաստանի հավասար քաղաքացիներ: Ի՞նչ է պետք դրա համար։ Դրա համար անհրաժեշտ է, որ դուք ձեր ձայների 80 տոկոսը չտաք իշխող կուսակցությանը։ Երբ ձայների 80 տոկոսը տալիս ես իշխանությանը, Թբիլիսիում սա կարդում ու մտածում են, որ ձեզ ոչինչ պետք չէ, ի՞նչ ձեզ հետ խոսեն: Եթե երեխան չխնդրի, մայրը նրան չի կերակրի։ Ադրբեջանցիները՝ Գարդաբանիում, Մառնեուլիում, իշխանություններին 20%-ից ավելի չեն տալիս։ Մենք ունենք ավելի քան 5000 տարվա պատմություն, առաջին քրիստոնյաներն ենք, բայց մեզ հետ հաշվի չեն նստում։ Ինչո՞ւ։ Ձեր ընտրության պատճառով: Մենք իշխանություններին ձայն տալու իրավունք չունենք»,- սկսեց Ռաիսյանը։
Նա իր ելույթում նշեց, որ եթե իշխանության ղեկին մնա իշխող կուսակցությունը, որը Վրաստանի համար ընտրել է ռուսամետ արտաքին քաղաքական ուղին, ապա Հայաստանի պետականությունը նույնպես կհայտնվի վերացման վտանգի առջև։ Ռաիսյանն անդրադարձավ նաև քաղաքացիության, ԲԹԿ երկաթուղում հայերի աշխատանքի տեղավորման, ընտրողների նկատմամբ ահաբեկումների, ճնշումների թեմային և այլն։
«Ազգային փոքրամասնությունների իրավունքների եվրոպական խարտիան սահմանում է, որ եթե որևէ տարածքում բնակչության 40%-ը հայեր (նկատի ունի էթնիկ փոքրամասնություններ) են, ապա երկրորդ տարածաշրջանային լեզուն պարտադիր պետք է լինի հայերենը (էթնիկ փոքրամասնությունների լեզուն), Արդարադատության տանը և այլն: Պատգամավորը պետք է լինի նրա համար, որ խորհրդարանում պաշտպանի իր շրջանի իրավունքները, իսկ գործող իշխանությունը դնում է բիզնես կամ ուրիշ այլ բան ունեցող մարդկանց, որ նրանք վախենան, որ դա իրենց ձեռքից կարող են խլել»,- ասաց նա։
Կարտոֆիլի իրացման խնդրին անդրադառնալիս՝ Ռաիսյանը նշեց, որ պետությունը սուբսիդավորում է Կախեթիում խաղողի մշակությունը, սակայն չի օգնում ջավախքցի ֆերմերներին, ովքեր կարտոֆիլ են աճեցնում։
Հանդիպման ավարտին ներկաներից մեկը հետաքրքրվեց, թե իրենց ծրագրում կա՞ քաղաքացիության հարցը։
«Անպայման: Եթե այս կոալիցիան գա իշխանության, ես առաջին իսկ շաբաթվա ընթացքում կզբաղվեմ այդ հարցով»,- պատասխանեց Ռաիսյանը։
Jnews-ին տված հարցազրույցում Ռաիսյանն ասաց, որ, ինչպես և միշտ, նախընտրական քարոզարշավում շատ խնդիրներ կան, բայց իրենք սովորել են։ Ըստ նրա՝ այս տարի ընտրողների նկատմամբ ճնշումներն էլ ավելի են շատացել:
«Ուղղակի դա արվում է ավելի աննկատ: Նրանք արդեն սովորել են, թե ինչպես ճնշում գործադրեն: Մենք շատ գյուղեր ենք գնացել, բայց մարդիկ չեն գալիս, նրանք կարտոֆիլ են հավաքում: Մենք դաշտեր էլ ենք գնացել: Շատ բնակիչներ վախենում են բարձրաձայնել խնդիրների մասին, բայց ես արդեն գիտեմ այս խնդիրների մասին, կարիք չկա ես դրանք բարձրաձայնեմ»,- մեկնաբանել է նա։
Կարդացե՛ք նաև.
«Գախարիան՝ Հանուն Վրաստանի» կուսակցության նախընտրական քարոզարշավն Ախալքալաքում
«Վրացական երազանքի» նախընտրական քարոզարշավն Ախալքալաքում
