Նախկին №1 զինվորական քաղաքը և «Ջիվանու» շրջանը քաղաքի հետ կապող փայտե կամրջի վրա երեկվանից առաջացել է մեծ անցք, որն սպառնալիք է հանդիսանում մարդկանց անվտանգ տեղաշարժմանը:
Անցքը քաղաքի կողմից է, միջին կազմվածք ունեցող մարդու չափի, բայց կամրջի վրա կան նաև մի քանի փտած տախտակներ, որոնք, եթե թեթև սեղմվեն, կարող են նման անցքեր դառնալ: Կամրջի բարձրությունը 30-40 մետր է:
Ցերեկվա ժամերին մարդիկ կարող են տեսնել անցքը և շրջանցել այն, բայց գիշերային աղոտ լուսավորության ժամանակ չիմացող անձի համար սա կյանքի իրական վտանգ է:
Ախալքալաքի Շրջանային վարչությունում այդ մասին չգիտեին: Շրջանային վարչության մասնագետ Արմեն Խաչատրյանի խոսքերով, նա այսօր նամակ կգրի նախագահին:
«Նա հրահանգ կտա ենթակառուցվածքային բաժնին և այսօր մենք կվերանորոգենք կամուրջը», – ասաց Արմեն Խաչատրյանը:
Կամրջի վթարային վիճակի մասին jnews.ge գրել է, սակայն Շրջանի ղեկավարությունից որևէ արձագանք չի եղել: Այդ ժամանակ մեզ պատասխանեցին, որ բնակիչները պետք է դիմում գրեն և հետո կորոշեն վերանորոգել կամուրջը, թե՝ ոչ:
Մինչև կլուծվի կամրջի վրա կյանքի սպառնալիքի վերացման խնդիրը, մնում է հուսալ, որ մինչ այդ դժբախտ պատահար տեղի չի ունենա:
Շուշան Շիրինյան
