Սեպտեմբերի 2-ին ավարտվում է «Օտարերկրյա գործակալների ռեգիստրում» կազմակերպությունների կամավոր գրանցման վերջնաժամկետը, որոնց 2023 թվականի ֆինանսավորման ավելի քան 20%-ը ստացվել է արտերկրից։ Ինչպես ավելի վաղ հայտնել էր Jnews-ը, Ախալքալաքում գործող 12 ՀԿ-ներից 4-ն է որոշել գրանցվել ռեգիստրում։ Jnews-ը զրուցել է այս կազմակերպությունների որոշ ներկայացուցիչների հետ այն մասին, թե որքան հեշտ է դա տրվում և որքան ժամանակ է պահանջվում այդ ռեգիստրում գրանցվելու համար: Մեկնաբանությունները մեջբերվում են անանուն՝ պատասխանողների խնդրանքով:
Ախալքալաքի ՀԿ-ներից մեկի տնօրենը Jnews-ին տված հարցազրույցում ասաց, որ ռեգիստրում գրանցումը բավականին բարդ գործընթաց է, շատ ժամանակ է պահանջում և կապված է որոշակի ծախսերի հետ։
«Հայտարարագիր լրացնելը երկար գործընթաց է, ամեն ինչ պետք է մանրամասն գրվի։ Այս հայտարարագիրը, այնուամենայնիվ, ներկայացնում ենք, միայն հիմա պետք է ամեն ինչ նկարագրել՝ 2023 թվականինը, ով որքան անգամ է աշխատավարձ ստացել, հարկերը, կենսաթոշակային ֆոնդը և այլն, շենքի գույքագրումը, թե ինչ են գնել, երբ են գնել, չնայած այն հանգամանքին, որ RS.ge-ն ունի այդ ամենը»,- պատմում է նա:
Նրա խոսքով, իրենց կազմակերպությունը պետք է վարձեր ֆինանսիստ և իրավաբան, որպեսզի լրացնեին բոլոր փաստաթղթերը: Գործընթացը տևել է մոտ 3 շաբաթ։
«Մենք սկսել ենք աշխատել հայտարարագրի կայքում հայտնվելուն պես, և դեռ աշխատում ենք։ Այնտեղ կան նրբություններ, որոնք մենք չգիտենք, թե ինչպես լրացնել, և, հետևաբար, խորհրդատվություն ենք ստացել իրավաբանից և ֆինանսիստից: Հիմա այս փուլում կլրացնենք, հետո ժամանակ կտան, եթե սխալներ լինեն, կշտկենք»,- նշում է նա։
Ախալքալաքում մեկ այլ ՀԿ-ի ներկայացուցիչը, ով նույնպես որոշել է գրանցվել ռեգիստրում, նշում է, որ մեծ դժվարություններ է առաջացնում վստահելի տեղեկատվության բացակայությունը, թե ինչ և ինչպես պետք է անել։
«Ծախսեր չկան, միայն հաշվապահ, եթե դուք նրան վարձում եք, որ լրացնի։ Բայց դժվարությունների պատճառը ոչ այնքան ծախսերն են, որքան այն, որ ոչ ոք չգիտի այս գործընթացի մասին ստույգ տեղեկություն։ Օրինակ, ես լսել եմ, որ պետք է գնալ գրանցվել առանց ֆինանսական հայտարարագրի, բայց Արդարադատության նախարարությունից ասում է, որ պետք է հայտարարագիրը բերել։ Հարցեր կան, որ ոչ նրանք, ոչ մենք խորապես չգիտենք։ Մենք չգիտենք, թե ինչպես դա անել ճիշտ», – մեկնաբանում է նա:
Նրա խոսքով, թեժ գծով նույնպես շատ աղոտ պատասխաններ են տալիս՝ առանց հստակության։
«Հայտարարագիրը բավականին բարդ է, հաշվապահն արդեն երկու շաբաթ է լրացնում է այն։ Ես հաստատ մենակ չէի կարող դա անել, հաշվապահ վարձեցի: Եվ փաստ չէ, որ մենք ճիշտ ենք լրացնում, դա հետո պարզ կլինի»։
Նա հավելում է, որ եթե կազմակերպությունն ունի գույք, և նրանք կարիք ունեն գույքագրման և աուդիտի, ապա դա արդեն կապված է մեծ ծախսերի և դժվարությունների հետ:
Հիշեցնենք, որ օգոստոսի 2-ից սկսվել է այն ՀԿ-ների գրանցումն այսպես կոչված «Օտարերկրյա գործակալների ռեգիստրում», որոնց 2023 թվականի համար ֆինանսավորման ավելի քան 20%-ը ստացվել է արտերկրից: Սեպտեմբերի 2-ին գրանցումը կփակվի, որից հետո կսկսվի այն կազմակերպությունների մոնիթորինգը, որոնք ընկնում են «Օտարերկրյա գործակալների մասին» օրենքի տակ, սակայն խուսափել են գրանցումից։ Նրանց սպառնում է 25 հազար լարի տուգանք և հարկադիր գրանցում։
