![](https://jnews.ge/am/wp-content/themes/jnews-2.3/images/animal.png)
Վարակաբան Մայա Բուցաշվիլին պարզաբանում է, թե որ հիվանդություններից պետք է պաշտպանվել, եթե պատրաստվում եք հանգստանալ ծովում։Ինչպես Interpressnews-ին հայտնել է Մայա Բուցաշվիլին, ամառային սեզոնին, հատկապես հանգստավայրերում, բնորոշ են ինչպես վիրուսային, այնպես էլ բակտերիալ վարակները, որոնք ուղեկցվում են փսխումով և փորլուծությամբ:
«Երբ խոսում ենք վարակիչ հիվանդությունների մասին, պետք է նշել փորլուծային հիվանդությունները, այսինքն՝ աղիքային վարակները։ Այն, ինչ մարդիկ անվանում են թունավորում, կապված է ծովի ջրի հետ, սակայն ավելի հաճախ վարակը տեղի է ունենում սննդի օբյեկտներում: Ծովափնյա հանգստավայրերում մարդկանց շատ մեծ կենտրոնացում կա։ Երբ սննդի օբյեկտները ծանրաբեռնված են, հաճախ հիգիենայի նորմերը պատշաճ կերպով չեն պահպանվում։ Սննդամթերքի պահպանման կանոնները կարող են խախտվել: Շոգ եղանակին, եթե մթերքը սառը վայրում չպահվի, դա կարող է առողջական խնդիրների հանգեցնել։
Տարածված են փսխումով և փորլուծությամբ ուղեկցվող հիվանդությունները։ Դասական թունավորումը և վարակը գլուխ է բարձրացնում, երբ սննդի մեջ տոքսին կա, և 2-3 ժամ հետո փսխման զգացում է սկսվում: Սա պատրաստի սննդի մեջ արտադրվող թույնի արդյունքն է, երբ դրանք պահվում են ոչ պատշաճ պայմաններում: Մենք հաճախ ենք տեսնում, թե ինչպես են մարդիկ գնում արձակուրդի և այնտեղ սկսում են փսխել, փորլուծությամբ տառապել, երբեմն նաև ջերմություն են ունենում: Հետո ստիպված են լինում հետ գնալ, հանգստի ժամանակ խնդիրներ են առաջանում։
Դժվար է խոսել համընդհանուր կանխարգելիչ միջոցառումների մասին, բայց հիմնականում կան մի քանի կանոններ. Առաջին՝ լվանալ ձեռքերը և պահպանել անձնական հիգիենան։ Հում մթերք, աղցաններ, կրեմով տորթեր՝ որոնց ռիսկը մեծ է, ավելի լավ է արագ սննդի կետերից և այլ վայրերից չգնել։ Ջերմային առումով թարմ մշակված սնունդն այս առումով ավելի անվտանգ է, քանի որ այն տաքացված է և անցել է ջերմային մշակում, ուստի ավելի քիչ վտանգ է պարունակում:
Ինչ վերաբերում է ջրին, ապա հանգտավայրերը կարող են ջրի հետ կապված խնդիրներ ունենալ, խողովակները կարող են վնասվել, այս դեպքում նախընտրելի է օգտագործել շշալցված ջուր։
Նաև ծովափնյա հանգստավայրերում հաճախ են արևի և շոգի հետ կապված խնդիրները: Պահանջվում է զգուշություն: Հնարավոր է գերտաքացում և «արևահարություն»: Ակտիվ ժամերին խուսափեք արևից։ Լողափ գնացեք առավոտյան և երեկոյան, խմեք շատ հեղուկ, ջուր»,- ասում է Բուցաշվիլին։