Ջավախքում կարտոֆիլի բերքահավաքին զուգահեռ մեկնարկել է նաև գազարի բերքահավաքը։ Խավեթ գյուղը ևս բացառություն չէ: Սեպտեմբերի սկզբին տեղացած ուժեղ կարկուտը վնասել է գազարի ցանքատարածությունները, ինչի պատճառով դժվարացել է բերքահավաքը։
Կարկուտը վնասել է գազարի ցողունը դժվարացնելով բերքահավաքը, գյուղացիները այժմ ստիպված են փորելով հատիկ-հատիկ գազարները հանել հողից։
Գյուղում քչերն են գազար ցանել մշակման դժվարություների և ցածր գնի պատճառով։ Խավեթում նշում են, որ այս տարի անցած տարվա բերքի կեսն էլ չեն հավաքի։ Գյուղացիները հույս ունեին, որ գազարի գինն այս տարի բարձր կլինի, բայց լրիվ հակառակն է ստացվել, գազարի գինը ոչ միայն ցածր է, այլև իրացման խնդիր ունեն:
Գնորդներից մեկի խոսքով, ով գյուղում փոխանակում է անում, այս տարվա գազարի բերքը փչացած է։ Կարկուտը վնասել է գազարի հողից դուրս մնացած հատվածները և գյուղացին վնասված գազարը չի կարող իրացնել։
«Ստիպված եմ գազարն ինքս իմ ձեռքով ընտրել և դասավորել, քանի որ այս տարվա բերքը վնասված է, չեմ կարող բարձր գնով գնել ու վերավաճառել։ Նախ մեծ շուկաներում էլ գինը բարձր չէ, և հետո ես վնասված գազարը չեմ կարող բարձր գնով վերավաճառել», – նշում է առևտրականը:
Խավեթցիների խոսքով, գազարի գնորդները շատ չեն և շուկան ինչ գին թելադրի, իրենք ստիպված կհարմարվեն, որ ունեցած բերքն էլ չփչանա:
1 կգ գազարն այժմ գյուղացիները վաճառում են 70 թեթրիով, իսկ մեծ քաղաքների շուկաներում գինը չի գերազանցում մեկ լարին, գինը համեմատաբար բարձր է սուպերմարկետներում և խանութներում՝ 1.50-1.75 լարի:
Գազարի բերքահավաքն սկսվում է սեպտեմբերի կեսերին և ավարտվում հոկտեմբերին։ Սակայն Խավեթում կարկուտի առաջացրած դժվարություների պատճառով այն սպասվածից ավելի երկար կտևի:
