Այսօր՝ հուլիսի 29-ին, Ախալքալաքի մունիցիպալիտետի Խուլգումո գյուղում հանդիսավորությամբ նշվեց «Թումաս»-ի կամրջի 10-ամյակը:
Կամուրջը կառուցվել է 10 տարի առաջ գյուղի բարերար՝ Թումաս Չիվչյանի կողմից:
Կամրջի շինարարական աշխատանքներն սկսվել են 2012 թվականի մարտ ամսին և ավարտվել 2013 թվականի դեկտեմբերին: Կամրջի բարձրությունը 41 մ է, երկարությունը 182 մ, իսկ լանությունը 2 մ: 10 տարի է կամուրջը Խուլգումոն և հարակից գյուղերը կապում է քաղաքին:
Խուլգումոն այսօր մարդաշատ էր: Մարդիկ հավաքվել էին «Թումաս»-ի կամրջի մոտ։ Միջոցառմանը ներկա էին Չիվչյանների գերդաստանը, գյուղի բնակիչները, Ախալքալաքի մունիցիպալիտետի ինքնակառավարման մարմինների ներկայացուցիչներ և հյուրեր տարբեր երկրներից:
Բարերարն իր շնորհակալությունը հայտնեց ներկաներին, իսկ ներկաները՝ Թումաս Չիվչյանին, այսպիսի կառույց մունիցիպլաիտետին նվիրելու համար: Չիվչյանները քայլեցին կամրջով, և սիմվոլիկ սպիտակ ու կարմիր փուչիկներ բաց թողեցին երկինք:
Այնուհետև միջոցառումը շարունակվեց գյուղի մշակույթի տանը (Այն նույնպես վերականգնվել է Թումաս Չիվչյանի բարերարությամբ):
Միջոցառմանն իրենց սրտի խոսքերով հանդես եկան Թումաս և Ռաֆիկ Չիվչյան եղբայներն ու նրանց որդիները, կամրջի շինարարության աշխատանքներն իրականացրած Ավթանդիլ Դուլխանյանը, Ախալքալաքի կրթական ռեսուրս կենտրոնի ղեկավար Թերեզա Չիվչյանը, Ախալքալաքի սակրեբուլոյի նախագահ Նաիրի Իրիցյանը և այլք։
Միջոցառումը պարային և երաժշտական համարներով գեղեցկացրին «Ջավախք» երգի-պարի ազգագրական համույթն ու գեղարվեստական ղեկավար Ալիկ Քսպոյանը:
Որպես շնորհակալություն Խուլգումոյի բնակիչների անունից շնորհակալագիր հանձնվեց Թումաս և Ռաֆիկ Չիվչյաններին:
Ինչպես նաև ցուցադրվեց վավերագրական ֆիլմ «Թումաս»-ի կամրջի ստեղծման վերաբերյալ:
Կամրջի կառուցման պատմությունը
Թումաս Չիվչյանի հայրը՝ Մկրտիչ Չիվչյանը Ախալքալաքի լաբորատորիայում է աշխատել։ Նրա մի ոտքը կաղ է եղել, եւ նրա համար շատ դժվար է եղել ձորն իջնել-բարձրանալ աշխատանքի հասնելու համար: Մի անգամ նա փորձել է աստիճաններ կառուցել, սակայն վաղաժամ մահը նրան չի թողել ավարտին հասցնել սկսած գործը: Թումասը տարիներ շարունակ երազանք է ունեցել՝ իր հայրիկի սկսած գործն ավարտին հասցնել: Եվ 2013 թվականին իրագործում է իր երազանքը:
Ստորև ներկայացնում ենք JNEWS-ի նկարահանած ֆիլմը «Թումաս»-ի կամրջի մասին, որը նկարահանվել է Խուլգումո գյուղի բնակիչների ֆինանսավորմամբ:
