Վրաստանի խորհրդարանն այսօր կքննարկի «Օտարերկրյա ազդեցության թափանցիկության մասին» և «Օտարերկրյա գործակալների գրանցման մասին» օրինագծերը։ Քննարկումը կընթանա խորհրդարանի արտաքին հարաբերությունների և պաշտպանության ու անվտանգության հանձնաժողովների համատեղ նիստում։
Օրենքների նախագծերը ներկայացրել են իշխող «Վրացական երազանք» կուսակցությունը լքած և «Ժողովրդի ուժը» շարժումը ձևավորած քաղաքական գործիչներ Սոզար Սուբարին, Դիմիտրի Խունդաձեն, Միխեիլ Կղավելաշվիլին, Գուրամ Մաճարաշվիլին, Դաչի Բերաիան, Վիկտոր Ջափարիձեն, Էկա Սեփաշվիլին, Դավիթ Կաճարավան և Զաալ Միքելաձեն։
Սկզբում խորհրդարանում նախաձեռնվել էր «Օտարերկրյա ազդեցության թափանցիկության մասին» օրինագիծը։ Այն նախատեսում է գրանցել որպես օտարերկրյա ազդեցության գործակալ այն իրավաբանական անձանց և ԶԼՄ-ներին, որոնց եկամուտը արտասահմանից կազմում է ընդհանուր եկամտի ավելի քան 20%-ից ավելին: Նույն օրինագծի համաձայն՝ բոլոր նրանք, ովքեր համարվում են օտարերկրյա ազդեցության գործակալներ, պետք է նույն անունով գրանցվեն Պետական ռեգիստրի տվյալների բազայում։ Գրանցվելիս անհրաժեշտ կլինի արտացոլել ստացված եկամուտը։ Միաժամանակ կազմակերպություններից կպահանջվի տարեկան ֆինանսական հայտարարագիր լրացնել:
Օրինագիծը լիազորում է արդարադատության նախարարությանը ցանկացած պահի իրականացնել հարցի ուսումնասիրություն և ուսումնասիրություն-մոնիթորինգ։ Որպես օտարերկրյա ազդեցության գործակալ գրանցվելուց խուսափելու կամ հայտարարագիր չլրացնելու համար կազմակերպության նկատմամբ կկիրառվի տուգանք 25 000 լարիի չափով։ Նախագծով նախատեսվում է նաև տուգանքների հետևյալ տեսակները. եթե կազմակերպությունը մուտքի օրվանից 10 աշխատանքային օրվա ընթացքում չի լրացնում դիմումի ձևը Արդարադատության նախարարության կայքում, ապա կտուգանվի 10 հազար լարիով, իսկ փաստաթղթերի թերությունները նշված ժամկետում չշտկելու դեպքում՝ 10 հազար լարիով, մեկ ամսում օրենքով սահմանված իրավախախտում կատարելու դեպքում` 20 հազար լարիով:
Ինչ վերաբերում է երկրորդ՝ «Օտարերկրյա գործակալների գրանցման մասին» օրենքի նախագծին, ապա դրա համաձայն՝ արտերկրից ֆինանսավորում ստացող ցանկացած ֆիզիկական և իրավաբանական անձ պարտավոր է գրանցվել որպես օտարերկրյա գործակալ։
«Օտարերկրյա գործակալների գրանցման մասին» օրենքով նախատեսված պարտավորությունը չկատարելը կամ ոչ պատշաճ կատարելն հանգեցնում է քրեական պատասխանատվություն և կպատժվի տուգանքով կամ ազատազրկմամբ՝ առավելագույնը հինգ տարի ժամկետով։
Օրինագծի համաձայն՝ այն սուբյեկտները, որոնք համապատասխանում են օրինագծով սահմանված չափանիշներին որպես օտարերկրյա ուժի գործակալ, պարտավոր են դիմել գլխավոր դատախազին և խնդրել գրանցել որպես օտարերկրյա ուժի գործակալ։
Օրենքը չի տարածվի դիվանագետների, հյուպատոսների և դիվանագիտական ծառայության և հյուպատոսական հիմնարկների աշխատակիցների վրա։ Օրենքը չի ազդի նաև օտարերկրյա պետության պաշտոնյաների, բարեգործական գործունեությամբ զբաղվող անձանց և «բարեխղճորեն զբաղվող կրոնական, կրթական, գիտական, ակադեմիական կամ գեղարվեստական գործունեությամբ» անձանց վրա։
