Սուլդա գյուղի բնակիչները իշխանություններից ու ոստիկանությունից պահանջում են, որ գյուղում արհեստական անհարթություններ տեղադրվեն։ Բնակիչները միշտ դժգոհում էին, որ գյուղով անընդհատ բեռնատարներն անցնում են մեծ արագությամբ, սակայն այսօր, երբ բեռնատարը վրաերթի է ենթարկել երեխայի, որոշել են չբացել ճանապարհը, մինչդեռ «պառկած ոստիկանները» չտեղադրվեն։
Սուլդա գյուղը գտնվում է Ախալքալաք-Կարծախ մայրուղու վրա, որը տանում է դեպի Թուրքիայի հետ սահման։ Այս ճանապարհով անընդհատ բեռնափոխադրումներ են իրականացվում մեծ բեռնատարներով։
Այսօր՝ հունիսի 11-ին, ժամը 10:00-ի սահմաններում, բեռնատարը վրաերթի է ենթարկել 7-ամյա աղջկա, նրան տեղափոխում են Թբիլիսի: Գյուղացիները հավաքվել ու բողոքում են, որ իրենց գյուղում մարդկանց տեղաշարժն անվտանգ չէ։ Ոստիկանության աշխատակիցները Սուլդա գյուղի բնակիչների, ինչպես նաև մունիցիպալ և մարզային իշխանությունների հետ զրուցելուց հետո խոստացել են, որ գյուղում՝ 7 վայրերում, կտեղադրվեն «պառկած ոստիկաններ»։
Այս խոստման համաձայն՝ նախատեսվում է այսպես կոչված պառկած ոստիկանները տեղադրել դպրոցի դիմաց (երկու կողմերից), գյուղական ակումբի մոտ (երկու կողմերից), բնակիչների հավաքատեղիի մոտ (երկու կողմերից), տեղացիները դա «նախրքաշ» են կոչում և մեկը՝ գյուղի մուտքի մոտ։
Սակայն այսօր դեռ ոչ բոլոր «պառկած ոստիկանները» կտեղադրեն։ Բնակիչներն անհանգստացած են, որ խոստացած 7-ն էլ չեն տեղադրվի: Եվ ասում են, որ եթե 2-3 օրում խոստումը չկատարեն, ճանապարհը նորից կփակեն։ Նրանք կսպասեն մինչև հունիսի 14-ը։
«Սա առաջին դեպքը չէ, մի կնոջ էլ էին վրաերթի ենթարկել, թողել ու հեռացել: Իհարկե, բեռնատարը շատ արագ էր քշում, թե չէ հասուն կինը մեքենայի տակ կընկնե՞ր: Բեռնատարը վրաերթի էր ենթարկել նաև ձիու սայլակը: Մեզ մոտ անընդհատ ինչ-որ բան տեղի է ունենում», – ասում է Սարո Ափոյանը:
Սկզբում բեռնատարներին թույլ չէին տալիս անցնել, սակայն այն բանից հետո, երբ երեխային վրաերթի ենթարկած բեռնատարը տարել են փորձաքննության և պայմանավորվել են տեղադրել 5 արհեստական անհարթություն, բեռնատարների համար ճանապարհը բացվել է։
Դեպքի վայրում են եղել Ախալքալաքի քաղաքապետ Մելքոն Մակարյանը և խորհրդարանի պատգամավոր Սամվել Մանուկյանը։ Նրանք զրուցել են բնակչության հետ՝ նշելով, որ այս ճանապարհի բարեկարգման ծրագրերում արդեն իսկ եղել է Սուլդայում արհեստական խոչընդոտների տեղադրում։ Այս մայրուղին սպասարկում է Վրաստանի ճանապարհային վարչությունը: Տեղական իշխանությունները տվյալ ճանապարհին անհրաժեշտ աշխատանքների մասին տեղեկատվություն են ներկայացրել դեպարտամենտ: Անհրաժեշտ աշխատանքների թվում է նաև արհեստական խոչընդոտների տեղադրումը։ Իսկ ավելի կոնկրետ ճանապարհի սպասարկումը պետք է իրականացնի «ՋավախԱվտոԳզա» ընկերությունը։
Սուլդայում բեռնատարը վրաերթի է ենթարկել երեխայի
