Երկրաշարժը, որը տեղի է ունեցել փետրվարի 13-ին, ժամը 22:25-ին և զգացվել է Վրաստանում, Հայաստանում և Ադրբեջանում, սարսափ է առաջացրել էպիկենտրոնում՝ Սամեբա գյուղում։ Խուճապին ավելացել էին լրացուցիչ ցնցումները, որոնք չէին զգացվել մնացյալ վայրերում, սակայն Սամեբայում դրանք բնակիչներին թույլ չէին տվել թուլանալ։ Բարեբախտաբար, ամեն ինչ ավարտվեց առանց զոհերի և ավերածությունների։
Փետրվարի 13-ի երեկոյան, տեղական ժամանակով ժամը 22:25-ին, Սամեբա գյուղի մոտակայքում տեղի է ունեցել 6.2 մագնիտուդով երկրաշարժ: Սա ամենահզոր ցնցումն է այն պահից ի վեր, երբ վերջին կես տարվա ընթացքում այդ վայրում պարբերաբար արձանագրվում են ակտիվ սեյսմիկ գործընթացներ, որոնք արտահայտվում են մինչև 3,5 մագնիտուդով ցնցումներով:
Երկրաբանական գործընթացների ուսումնասիրման գիտությունների ինստիտուտի և սեյսմիկ մոնիթորինգի ազգային կենտրոնի մասնագետները նախազգուշացրել էին, որ առաջին՝ բավականին ուժգին երկրաշարժից հետո, ավելի ցածր՝ շուրջ 3,5 մագնիտուդով ցնցումները կշարունակվեին ամբողջ գիշերվա ընթացքում:
Սամեբա գյուղի հենց էպիկենտրոնում երկրաշարժն այնքան ուժգին է զգացվել, որ մարդիկ ամբողջ գիշեր չեն քնել։ Գյուղում հակված են կարծել, որ նման ակտիվության պատճառը հրաբուխն է, որը գտնվում է իրենց գյուղից ոչ հեռու
։
«Ամեն ինչ կարգին է, ավերածություններ չկան, վնաս չի հասցվել: Հիմա մի փոքր հանգստացել ենք: Չնայած շատ էինք վախեցել, սարսափելի էր, ամբողջ գիշեր դողում էի: Նման բան նախկինում չէր եղել: Ամբողջ գիշեր լույսը վառ էինք թողել: Մի րոպե անգամ չկարողացանք աչք փակել: Երեխաները շատ վախեցան։ Երեխաներն անմիջապես դուրս ցատկեցին փողոց։ Այս անգամ սովորականից շատ ավելի սարսափելի էր»,- ասում է գյուղի բնակիչ Գագիկ Մարկոսյանը։
2021 թվականի գարնանից ի վեր Սամեբա գյուղում անընդհատ ցնցումներ են զգացվում, սակայն մինչ երեկվա երկրաշարժն ամենահզոր ցնցումները գրանցվել էին 5,1 մագնիտուդ ուժգնությամբ։ Սեյսմոլոգները վստահեցնում էին, որ լեռնաշղթան հրաբխային ծագում ունի, սակայն լեռներն այժմ ակտիվություն չեն ցուցաբերում, իսկ ցնցումները անավարտ գործընթացների արդյունք են, և, որ անհանգստանալու կարիք չկա։
Սամեբա. Կյանքը երկրաշարժի էպիկենտրոնում (Photo/Video)
Նախօրեին տեղի ունեցած երկրաշարժը զգացվել է Թբիլիսիի, Բաթումիի և Վրաստանի այլ շրջաններում: Խոշոր քաղաքների շատ բնակիչներ տներից դուրս են եկել փողոցներ: Բարեբախտաբար, երկրաշարժը զոհեր և ավերածություններ չի առաջացրել, այդ թվում՝ էպիկենտրոնում՝ Դմանիսիում: Վրաստանի տարածքում առաջացած ստորգետնյա ցնցումները զգացվել են նաև Երևանում և Գյանջայում:
