Ապրիլի 23-ի երեկոյան Ախալքալաքում տեղի ունեցավ ջահերով երթ, նվիրված հայոց ցեղասպանության 101-րդ տարելիցին:
Երթն սկիզբ առավ Ախալքալաքի բերդից ժամը 19:00-ի սահմաններում: Մինչև երթի մեկնարկը բերդի տարածքում հնչեցին հայրենասիրական երգեր և ջահակիրները պարեցին քոչարի: Այնուհետև երթի մասնակիցները վառված ջահերով և ցեղասպանությունը դատապարտող կոչերով շարժվեցին դեպի Ախալքալաքի կենտրոն՝ հայոց գրերի ստեղծող Մեսրոպ Մաշտոցի արձանի մոտ: Այնտեղ ելույթներով հանդես եկան մի շարք հասարակական գործիչներ։ Նրանք իրենց խոսքերում շեշտում էին. «Մենք հող չենք կորցրել՝ հայրենիք ենք կորցրել»: Ջահակիրները կոչ արեցին եղբայրական վրաց ժողովրդին՝ ճանաչել Հայոց ցեղասպանությունը: Նրանք մոմերով “101” պատկերեցին արձանի մոտ:
Այնուհետև երթի մասնակիցները շարժվեցին Սուրբ Խաչ եկեղեցի, որտեղ մոմ վառեցին և աղոթեցին միլիոն ու կես սուրբ նահատակների հոգիների հանգստության համար։ Այնուհետև եկեղեցու բակում ազգային պարերով եզրափակվեց երթը:
Ջուլիետա Տոնականյան
