Ախալքալաքի մունիցիպալիտետի քաղաքապետարանը տվյալներ չի հավաքում հագուստի տոնավաճառի աշխատակիցների կամ այլ անձանց մասին, ովքեր կորոնավիրուսի համավարակի պատճառով կորցրել են իրենց աշխատանքը: Քաղաքապետարանը կարող է պարզապես տեղեկանք տրամադրել առ այն, որ անձն աշխատել է «տոնավաճառում», որպեսզի առևտրականները կարողանան օգտվել կառավարության 300 լարիի չափով միանվագ փոխհատուցումից:
Ախալքալաքի մունիցիպալիտետի բնակիչները, ովքեր Վրաստանում արտակարգ դրության պայմաններում կորցրել են իրենց աշխատանքը, տեղեկատվության և միջոցների որոնման մեջ են, որոնց միջոցով նրանք կկարողանան օգտվել կառավարության փոխհատուցումից: Մարդիկ չգիտեն, թե ում դիմել և ինչ անել, այս ծրագրում ընդգրկվելու համար:
Ինչպե՞ս կարող են վաճառականները, ովքեր կորցրել են իրենց աշխատանքը, ստանալ 300 լարի
Ախալքալաքում տեղեկություն է տարածվել այն մասին, որ քաղաքապետարանում փոխհատուցման համար հավաքում են Ախալքալաքի հագուստի տոնավաճառի աշխատողների ցուցակը և անձնագրային տվյալները: Այլ աշխատակիցներ նույնպես ցանկանում են ընդգրկվել այս ցուցակում: Տարբեր մարդիկ արդեն սկսել են տարբեր ցուցակներ հավաքել: Սակայն, Ախալքալաքի մունիցիպալիտետի քաղաքապետարանից հստակեցրին, որ նրանք փոխհատուցման համար որևէ ցուցակ չեն հավաքում:
«Ես առաջարկել եմ, որ ինչ-որ մեկը հավաքի տոնավաճառի բոլոր աշխատողների ցուցակը և անձնագրային տվյալները, որպեսզի երբ հարց առաջանա այդ մասին, նրանք անմիջապես այդ ցուցակը ներկայացնեն: Չնայած յուրաքանչյուրը համապատասխան կայքում պետք է գրանցվի ինքնուրույն, մենք պետք է նրանց տեղեկանք տանք, որը կհաստատի, որ այդ մարդն աշխատել է տոնավաճառում, և փակվելուց հետո մնացել է առանց աշխատանքի», – ասաց Ախալքալաքի մունիցիպալիտետի քաղաքապետ Յուրիկ Ունանյանը:
2,5 տարի է ինչ Ախալքալաքի հագուստի տոնավաճառն աշխատում է առանց կազմակերպչի: Առևտրականները չեն վճարում իրենց տեղերի համար: Տոնավաճառն անմիջական ղեկավարություն չունի, այդ իսկ պատճառով տեղեկանքն առ այն, որ վաճառականը իրականում աշխատել է տոնավաճառում, կտրվի քաղաքապետարանի կողմից:
Որպեսզի մարդիկ միանվագ 300 լարիի չափով օգնությունը ստանան, նրանք պետք է Առողջապահության նախարարության www.moh.gov.ge կայքում լրացնեն էլեկտրոնային ձևաթուղթը, ոչ ուշ, քան հուլիսի 1-ը: Այս ձևաթուղթը հասանելի կլինի մայիսի 15-ից: Ձևաթղթում նրանք պետք է նշեն.
– Անուն, ազգանուն, անձնական համար
– Կոնտակտային տվյալները (փաստացի հասցեն և հեռախոսահամարը)
– Բանկային հաշվեհամարը
– Մինչև արտակարգ դրության հայտարարությունը եկամտի աղբյուրի մասին տեղեկատվությունը:
Վաճառականների համար նման տեղեկատվություն կարող է ծառայել շուկայի ղեկավարության կողմից տրված տեղեկանքը, որ այդ անձը 2020 թվականի առաջին եռամսյակում շուկայի տարածքում զբաղվել է առևտրով: Շուկայի ղեկավարության բացակայության դեպքում նման տեղեկանք կարող է տրամադրել տեղական մունիցիպալիտետը:
