Կուլիկամ գյուղում չորս տարի տևած մանկապարտեզի շենքի կառուցումն ավարտված է, սակայն Ախալքալաքի Մանկապարտեզների միավորման տնօրինությունից հայտնում են, որ նախակրթարանի գործնեության համար նախատեսված գումար չունեն:

Ամենայն հավանականությամբ, նոր մանկապարտեզը կգործի 2020 թվականից:

Դեռ 2016 թվականին, Ախալքալաքի շրջանի Կուլիկամ գյուղում սկսվեց մանկապարտեզի նոր շենքի կառուցումը, որն ավարտին հասցվեց միայն այս տարի:

Նախակրթական տարիքի երեխաների ծնողները պահանջում են նորմալ մանկապարտեզ՝ ալտերնատիվի փոխարեն: Այս պահի դրությամբ գյուղում գործող ալտերնատիվ մանկապարտեզ է հաճախում 13 երեխա, իսկ ավելի քան 30 երեխա քաղաքի մանկապարտեզներ:

Թե մանուկների ծնողները, թե Մանկապարտեզների միավորման տնօրենն այս ամենի պատճառը համարում են ալտերնատիվ մանկապարտեզի շենքային պայմանները:

Պայմաններն այսպիսին են՝ վարձակալած տուն, առանց լուսավորության հնարավորության, առանց զուգարանի, իսկ ջեռուցումը՝ փայտե վառարանով: Հատակին փռված հնամաշ գորգերը ծնողներն են բերել իրենց երեխաների համար:

Ախալքալաքի Մանկապարտեզների միավորումը Կուլիկամում ալտերնատիվ մանկապարտեզի շենքի համար ամեն ամիս 200 լարի վարձակալության գումար է տալիս, ավելացրած՝ 2 դայակի, 2 դաստիարակի և այլնի համար:

Գյուղում մանկապարտեզի տարիքի երեխաներ շատ կան, իսկ ինչի՞ չեն հաճախում գյուղի մանկապարտեզ հարցը շատ պարզ պատասխան ունի, որովհետև պայմաններ չկան:

«Յուրաքանչյուր ծնող աշխատում է, ամեն ինչ անում է, որ իր երեխան ավելի լավ մանկապարտեզ հաճախի: Ես իմ երեխային քաղաք եմ տանում, որովհետև այստեղ ահավոր է: Մի տարի ուղարկեցի ալտերնատիվ, հետո տեղափոխեցի քաղաք, չնայած, որ տեղափոխությունը հավելյալ միջոցներ ու ժամանակ է պահանջում ինձանից: Բայց մեկ տարվա մեջ իմ երեխան մի անգիր նույնիսկ չէր սովորել, ուտելիք չկար, ոչ մի բան չկար», – պատմում է մի ծնող, ով վստահեցնում է, եթե գյուղում նոր մանկապարտեզը նորմալ գործի և երեխաների հետ աշխատեն մասնագետ մանկավարժներ, միայն այդ դեպքում իր երեխային քաղաքից գյուղ կբերի:

Արդեն 7 տարի է Կուլիկամի ալտերնատիվ մանկապարտեզը գործում է նույն պայմաններով: Ճիշտ է, դաստիարակներն ու դայակները տարիների ընթացքում փոխվել են, սակայն նրանցից որևէ մեկն այդպես էլ վերապատրաստման ոչ մի կուրս չի անցել:

Չորս տարի առաջ սկսված նոր շենքի կառուցումն ավարտված է, բայց հիմա էլ մեկ այլ խնդիր կա: Պարզվում է Մանկապարտեզների միավորման տարեկան բյուջեում նոր նախակրթարանի գործնեության ու շենքի կահավորման համար նախատեսված գումար չկա:

«Կուլիկամի մանկապարտեզի շինարարությունն ավարտվել է, բայց գումար չկա նախատեսված՝ ոչ կահույքի, ոչ աշխատավարձի, ոչ ուտելիքի համար: Դրա համար այս տարի չի բացվի»,- Jnews-ին հայտնեց Մանկապարտեզների միավորման տնօրեն Անահիտ Ասատրյանը:

Վերջինս մեկ ամիս առաջ է նշանակվել այս պաշտոնին: Տեղյակ չէ, թե ինչու՞ տարեկան բյուջեում նախատեսված գումար չկա այս մանկապարտեզի համար: Նա ընդամենը երկու օր առաջ շրջայց է կատարել Կուլիկամ և Կարտիկամ գյուղերում գործող ալտերանտիվ մանկապարտեզներում:

«Ներս եմ մտել ժամը 15:30-ին, ոչ մի երեխա չկար, իսկ աշխատողները մաքրում էին, որ տուն գնային: Ես ի վիճակի չեմ այդպես մանկապարտեզ պահել: Առավոտյան 9-ից 6-ն իմ դայակը քաղաքում ստանում է նույն փողը, իսկ իրենց երկու դայակն ու դաստիարակը մեկ ժամ են գնում և ստանում նույն գումարը: Սա ֆինանսական խախտում է, եթե իրենք ուզում են երկու խումբ աշխատի, ես այդպես կանեմ, կթողնեմ մեկ հաստիք, որը կկիսեմ երկուսի մեջ: Բայց ամենակարևոր խնդիրն այստեղ այն է, որ մանկապարտեզում երեխա չկար: Ինչի պետք է երկրորդ հերթափոխ լինի, եթե երեխա չկա: Կոնկրետ չեմ կարող ասել, թե ինչ եմ անելու, բայց այս հարցին լուծում է պետք: Երևի նոր կառուցված շենք կտեղափոխեմ իրենց ունեցած կահույքով ու խաղալիքներով, բայց ավել բան չեմ կարող անել»,- ասաց Մանկապարտեզների միավորման տնօրեն Անահիտ Ասատրյանը:

Իսկ, թե կոնկրետ երբ կգործի Կուլիկամ գյուղի մանկապարտեզի նորակառույց շենքը անհայտ է: Ծնողներին ու մանուկներին մնում է սպասել …

Աղունիկ Այվազյան