Վրաստանի մունիցիպալ զարգացման հիմնադրամը Ախալքալաքի մունիցիպալիտետի Չունչխա գյուղի դպրոցի կառուցման համար տենդեր է հայտարարել:
Չունչխա գյուղի դպրոցում սովորում է 91 աշակերտ, որոնցից 28-ը հարևան Պտենա գյուղից են:
Շուտով, մրցույթից հետո Չունչխայում կսկսվի նոր դպրոցի շինարարությունը:
Գնման նախահաշիվային արժեքը կազմում է 1 905 230 լարի: Տենդերային հայտերն ընդունվում են մայիսի 29-ից մինչև հունիսի 3-ը:
Մրցութային փաստաթղթերի համաձայն՝ կկառուցվի 9 դասասենյակ, 3 գրասենյակ և 1 լաբորատորիա:
Դպրոցում նաև տեղ է հատկացվելու տնօրենի առանձնասենյակի, հաշվապահության և բժշկի սենյակի համար:
Դպրոցի տնօրեն Էմզար Պապիձեի խոսքով, նոր դպրոցը կունենա նաև արխիվ, գրադարան, ճաշասենյակ, ախտահանիչ պահարաններով, սանհանգույց և հանգստի գոտի:
Հիշեցնենք, որ 2016 թ. նոյեմբերի 1-ին Ախալքալաքի մունիցիպալիտետի Չունչխա գյուղի միջնակարգ դպրոցի փայտե շենքում հրդեհ էր բռնկվել: Չունչխա գյուղի վրացական դպրոցը բաղկացած էր երկու մասնաշենքերից` դպրոցի հիմնական շենքից (տեղակայված նախկին մանկապարտեզի շենքում) և փայտե ֆիննական տնակից, որը այրվել էր հրդեհի արդյունքում: Դրանից հետո աշակերտների մի մասը շարունակեցին իրենց ուսումը գյուղապետարանին պատկանող շենքում:
Հարեւան Պտենա գյուղի աշակերտները նույնպես սովորում են Չունչխայի միջնակարգ դպրոցում: Պտենա գյուղի դպրոցը գտնվում է վթարային վիճակում, արդեն քանի տարի է, ինչ Վրաստանի կրթության և գիտության նախարարությունն այնտեղ արգելել է դասեր անցկացնել: Դասերը Չունչխայի դպրոցում անցկացվում են երկու հերթափոխով: Առաջին հերթափոխով դաս են անում Չունչխա գյուղի աշակերտները, իսկ երկրորդով՝ Պտենայի աշակերտները:
Բրատիսլավ Իգիթխանյան
