| «Green Way» ընկերությունը, որն Ախալքալաքում ժամանակավորապես իրականացնելու է ավտոմեքենաների տեխզննումն, այսօր սկսել է սարքավորումների տեղադրման աշխատանքները: «Green Way» ընկերությունը գործելու է Վաչիանի ավտոմայրուղու վրա գտնվող բենզալցակայանի տարածքում, նախկին №1 զինվորական ավանի մոտակայքում: «Green Way» ընկերության տնօրեն Մալխազ Նադիրաձեի խոսքերով, այսօր նրանք կտեղադրեն սարքավորումները, կանցկացնեն էլեկտրականությունը եւ երկու օրվա ընթացքում արդեն կսկսեն անցկացնել տեխզննումը: «Իմ աշխատողներն այսօր կգան, մենք կտեղադրենք սարքավորումները, եւ, հավանաբար, վաղը կամ դրա հաջորդ օրը մենք կսկսենք աշխատել մեքենաների հետ: Մենք ստուգում ենք մեքենան ըստ բոլոր չափանիշների, ու կտանք տեղեկանք , որ անցել է տեխզննումը, իսկ եթե մեքենան չանցնի ստուգումը, ապա կգրենք ինչ խնդիրներ ունի մեքենան »,- ասում է Մալխազ Նադիրաձեն: Նորմերին չհամապատասխանելու դեպքում վարորդները պետք է մեկ ամսվա ընթացքում խնդիրը շտկեն: Երկրորդ տեխզննումն անվճար է, բայց եթե վարորդը չվերացնի խնդիրը, ապա նա խախտման համար կտուգանվի 50 լարիով: Ախալքալաքի շարժական կենտրոնը կաշխատի ժամը 10:00 մինչեւ 19:00: Կենտրոնը օրվա ընթացքում քանի մեքենա կկարողանա ստուգել, տնօրենը չկարողացավ ասել, նշելով, որ օրինակ, մեքենան պետք է չոր լինի, որը հատկապես ձմռանը եւ Ախալքալաքի եղանակային պայմաններում խնդիր է հանդիսանում: Թեթև մարդատար ավտոմեքենայի տեխզննումը կազմում է 60 լարի, բեռնատար եւ ուղեւորափոխադրող մեքենաների համար՝ 100 լարի: Տեխզննման համար Դուք կարող եք վճարել բանկում, համացանցի կամ վճարման ապարատների միջոցով: Իրավիճակը մեղմելու համար Ախալքալաքի մունիցիպալիտետի եւ Սամցխե-Ջավախեթիի շրջանի տեղական իշխանությունները բանակցություններ են վարել եւ նպաստել են Ախալքալաքում շարժական կենտրոնի բացմանը: Կենտրոնը կաշխատի մինչեւ Խոսպիո գյուղի մոտ կառուցվող Ախալքալաքի տեխնիկական զննման կենտրոնի կառուցումը: |
Շուշան Շիրինյան
