![](https://jnews.ge/am/wp-content/themes/jnews-2.3/images/animal.png)
Ախալքալաքի շրջանի Բուղաշեն գյուղում նոր դպրոց է կառուցվել, աշակերտներն անհամբեր սպասում են շենքի գույքավորմանը, որպեսզի վերջապես հաճախեն այդքան սպասված դպրոց:
Բուղաշենցիները նոր դպրոց ունենալուն շատ երկար են սպասել։ Տասնամյակներ շարունակ երեխաներն ամեն օր փլուզման վտանգի ներքո միջնակարգ կրթություն էին ստանում: Մոտավորապես 100 աշակերտ դեռ հաճախում են Բուղաշենի հին դպրոց, մինչև նորը պատրաստ կլինի ընդունել նրանց:
Բուղաշեն գյուղի հին դպրոցը կառուցվել է 1959 թվականին և սովետական միության փլուզումից հետո երբեք չի վերանորոգվել։ Երկար տարիներ անց, գյուղացիների և տնօրենի ջանքերի շնորհիվ պետությունը վերջապես ուշադրություն դարձրեց գյուղի կարևորագույն և երեխաների կյանքին սպառնացող հիմնախնդրի վրա։
Պետությունը խոստացել էր, որ մինչ 2013 թվականը Բուղաշենը կունենա նոր, տիպային դպրոց։
Սակայն նոր դպրոցի շինարարական աշխատանքներն սկսվեցին 2013 թվականի նոյեմբերին։
Դպրոցի շինարարությունը վստահվել է «Արխիկուլտուրա» ՍՊԸ-ին: Վերջինս հաղթել է հայտարարված տենդերը։ 2015 թվականի մարտ ամսից արդեն վերջացել են շինարարական աշխատանքները։ Սակայն նոր դպրոցի շենքը դեռ շահագործման չի հանձնվել, քանի որ դեռևս կահավորված չէ:
Բուղաշենի դպրոցը կառուցվել է 2013 թվականի պետական ծրագրով, որի շրջանակներում հիմնովին նոր 9 դպրոց կառուցվեց Վրաստանում։
Քրիստինե Մարաբյան