Այսօր՝ օգոստոսի 8-ին, Ախալքալաքի մունիցիպալիտետի Կոթելիա գյուղում հարգանքի տուրք մատուցվեց 2008 թվականի օգոստոսյան պատերազմում զոհված Թամազ Մելիքիձեի հիշատակին։ 16 տարի առաջ Մելիքիձեն օգոստոսի 6-ին ինքնակամ գնացել էր մարտական գոտի և զոհվել օգոստոսի 9-ի առավոտյան՝ ռմբակոծության հետևանքով։
Նրա հիշատակին գյուղի գերեզմանատանն էին հավաքվել հարազատները, ընտանիքի անդամները, համագյուղացիները և Ախալքալաքի տեղական ինքնակառվարման մարմինների ներկայացուցիչները։ Ներկա էին քաղաքապետ Մելքոն Մակարյանը, սակրեբուլոյի նախագահ Նաիրի Իրիցյանը, ինչպես նաև Վրաստանի խորհրդարանի նախկին պատգամավոր Սամվել Պետրոսյանը։
Քաղաքապետարանի Իրավաբանական ծառայության վարչության պետ Թեյմուրազ Մանվելյանն իր խոսքում նշեց․
«Ինչպես գիտեք, 2008 թվականին պատերազմի ընթացքում Վրաստանի տարբեր անկյուններից մեր քաջարի զավակները իրենց կյանքը զոհաբերեցին մեր հայրենիքի համար։ Մեր մունիցիպալիտետի Կոթելիա գյուղից ունենք հերոս՝ Թամազ Մելիքիձեն, ով իր կյանքը զոհաբերեց այսօրվա խաղաղության համար։ Առաջին հերթին կիսում ենք նրա ընտանիքի վիշտը, և ուզում եմ, որ փառաբանենք բոլոր հերոսներին»։
Զոհվածի ընտանիքն ուզում է, որ Թամազ Մելիքիձեի անվան հուշարձան կանգնեցվի։ Անցած տարի տարածքի բարեկարգման համար երեք անգամ էլեկտրոնային մրցույթ է հայտարարվել, սակայն մասնակիցների բացակայության պատճառով, մրցույթը չի կայացել։
«Կոթելիա գյուղում հայրենական պատերազում զոհվածներին նվիրված հուշահամալիր կա, անցած տարի երկու-երեք անգամ էլեկտրոնային մրցույթ հայտարարեցինք, որպեսզի բարեկարգենք այդ տարածքը, սակայն մասնակիցներ չեղան, տեխնիկական հարցեր կային։ Հիմա նոր նախագիծ ենք պատրաստել, փոփոխութուններ ենք արել և նորից մրցույթ ենք հայտարարել։ Վաղը վերջին օրն է։ Եթե մասնակից լինի, ապա այս տարվա մեջ կբարեկարգենք տարածքը։ Գյուղացիներն ուզում են այդ հուշահամալիրի մոտ իրենց միջոցներով Թամազ Մելիքիձեի կիսանդրին կանգնեցնել, որպեսզի նրա շիրիմին գնալու փոխարեն, մարդիկ գյուղում հավաքվեն ու հարգանքի տուրք մատուցեն», – ասաց Ախալքալաքի քաղաքապետ Մելքոն Մակարյանը։
Թամազ Մելիքիձեն ծնվել է Կոթելիա գյուղում 1976 թվականին, սովորել է գյուղի հանրակրթական դպրոցում: Պարտադիր զինծառայությունն անցնելուց հետո, անցել է պայմանագրային ծառայության: Զոհվել է 2008 թ.-ի օգոստոսի 9-ի առավոտյան, Գորիում ռմբակոծության հետևանքով:
