Այսօր՝ սեպտեմբերի 15-ին Առաջին զանգը հնչեց Ախալքալաքի մունիցիպալիտետի 64 դպրոցներում, առաջին դասարան հաճախեց 563 երեխա: Առաջին դասարան չի բացվել միայն Ափնիա գյուղի դպրուցում։ Jnews-ը շնորհավորում է բոլոր առաջին դասարանցիներին ուսումնական օրվա առթիվ:
Լայն ժպիտներ, գեղեցիկ ծաղկեփնջեր, հուզմունքից թրթռացող սրտեր․․․ այսօր առաջին դասարանցիներն առաջին անգամ մտան դպրոց։
Դպրոցների տնօրեններն ու ուսուցիչները ողջունեցին ներկաներին, շնորհավորեցին նոր ուսումնական տարվա մեկնարկի կապակցությամբ և մաղթեցին, որպեսզի այս տոնական օրվա խանդավառությունն աշակերտներին մշտապես ուղեկցի հայտնություններով հարուստ գիտելիքների աշխարհ։
2023-2024 ուսումնական տարվա դասերի մեկնարկը տրվում է սեպտեմբերի 15-ից: Ուսումնական տարվան ընդառաջ՝ դպրոցները համալրվում են անհրաժեշտ դասագրքերով և գույքով։ Ընդհանուր առմամբ՝ Վրաստանում առաջին դասարան է հաճախում 60 000 երեխա։
2023 թվականին դպրոց են հաճախում այն երեխաները, որոնք 6 տարեկան են դառնում մինչև նոյեմբերի 1-ը։
Աշակերտները դասագրքեր են ստանում անվճար, ինչպես նաև նեթբուքեր։
Վիճակագրության համաձայն՝ Վրաստանում գործում է 2 086 պետական և 222 մասնավոր կրթական հաստատություններ։ Ախալքալաքի մունիցիպալիտետում գործում է 65 դպրոց, բոլորը պետական են։
Ախալքալաք քաղաքի 5 դպրոցներում բացվեց 10 առաջին դասարան։
№1 հանրակրթական դպրոցն ընդունեց 28 երեխա, այստեղ բացվել է 2 առաջին դասարան:
Քաղաքի №2 ռուսական դպրոցում բացվել է 4 դասարան, որտեղ կսովորի 80 երեխա:
Քաղաքի №3 վրացական դպրոց սկսեցին հաճախել 19 առաջին դասարանցի:
Ախալքալաքի №4 հանրակրթական դպրոցն ընդունեց 48 երեխա:
Քաղաքի №5 հանրակրթական դպրոցն ընդունեց 9 աշակերտ:
