Այսօր Ախալքալաքի Սուրբ Խաչ եկեղեցու բակում ջավախքցիներն առանձնակի հպարտությամբ ու ոգևորությամբ դիմավորեցին բռնցքամարտի Եվրոպայի առաջնության չեմպիոն՝ Արտյուշ Գոմցյանին։
Եկեղեցու բակում էին. Ախալքալաքի քաղաքապետ Մելքոն Մակարյանը, Սակրեբուլոյի նախագահ Նաիրի Իրիցյանը, Ախալքալաքի մշակույթի տան տնօրեն Ալիկ Քսպոյանը, Սամցխե-Ջավախքի և Ծալկայի ընդհանուր առաջնորդական տեղապահ Տեր Նշան վրդ. Հմայակյանը, մարզական ոլորտի ներկայացուցիչներ, չեմպիոնի ընկերներն ու հարազատները, ծանոթ ու անծանոթ մարդիկ: Ջավախքցիները եկել էին դիմավորելու իրենց չեմպիոնին:
Արտյուշ Գոմցյանը եկեղեցու բակ մտավ հայկական դհոլ-զուռնայի հնչյունների ներքո, հավաքված բազմությունը ծափերով դիմավորեց բռնցքամարտի Եվրոպայի առաջնության չեմպիոնին։ Իսկ «Ջավախք» անսամբլի տղաները հանդես եկան Յարխուշտա պարով։
Այստեղ էր գտնվում նաև Գոռ Այվազյանը, ով ապրիլի 21-ին, Բուլղարիայի մայրաքաղաք Սոֆիայում էր դարձել 2022 թվականի Եվրոպայի բռնցքամարտի երիտասարդական առաջնության չեմպիոն:
Շնորհակալական խոսքով հանդես եկավ Գոմցյանի անձնական մարզիչ և Ախալքալաքի մարզահամալիրի տնօրեն Ատոմ Էլիզբարյանը։ Նա նշեց, թե ինչպես է մենամարտերի ժամանակ Արտյուշ Գոմցյանին հաղթելու ուժ տվել հայաստանաբնակ ջավախցիների ներկայությունը:
«Զգացվում էր, երբ Գոմցյանը հոգնում էր, երկրպագուների ձայներից ոգեշնչվում էր և ավելի լավ կռվում»:
Էլիզբարյանը հպարտությամբ է խոսում իր սանի մասին, նշելով, որ էլ ավելի մեծ հաղթանակներ են գրանցելու և հնչեցնելու Ջավախք անունն աշխարհով մեկ։
«Լավ պատրաստվել էինք մրցաշարին։ Արտյուշը չորս մենամարտերում էլ հաղթանակ գրանցեց։ Եզրափակչում շատ ծանր պայքար էր, Արտյուշը մենամարտեց Իսպանիայի ներկայացուցչի հետ, ով համարվում էր առաջնության ֆավորիտ, բայց մեր Արտյուշը հաղթեց և հռչակվեց Եվրոպայի չեմպիոն», – հպարտությամբ նշեց Արտյուշի անձնական մարզիչը։
Հիշեցնենք, որ մայիսի 30-ին Երեւանում, Կարեն Դեմիրճյանի անվան մարզահամալիրում կայացավ 2022 թվականի բռնցքամարտի Եվրոպայի մեծահասակների առաջնության եզրափակիչ փուլը։ Վրաստանի ազգային հավաքականի կազմում Ջավախքից Արտյուշ Գոմցյանը, 60 կգ քաշային կարգում, նվաճեց չեմպիոնի տիտղոսը:
Արտյուշ Գոմցյանը Վրաստանի բազմակի չեմպիոն է, ինչպես նաև միջազգային տարբեր մրցումների մեդալակիր։ Նա Ախալքալաքի մարզահամալիրի սան է:
