Վրաստանի ազգային վիճակագրական ծառայության նախնական գնահատականների համաձայն՝ 2026 թվականի հուլիսին իրական համախառն ներքին արդյունքի (ՀՆԱ) աճը, նախորդ տարվա նույն ժամանակահատվածի համեմատ, կազմել է 8%: Տարվա առաջին յոթ ամիսների միջին աճի տեմպը կազմել է 7.9%:

Տվյալների համաձայն՝ հուլիսին Վրաստանում մասնավոր հատվածի, այսինքն՝ ԱԱՀ վճարող ընկերությունների շրջանառությունը կազմել է 17.7 միլիարդ լարի, ինչը 12.6%-ով ավելի է նախորդ տարվա նույն ժամանակահատվածի համեմատ։

Ըստ Ազգային վիճակագրական ծառայության տվյալների՝ հուլիսին աճ է գրանցվել տնտեսության գրեթե բոլոր ոլորտներում։ Բացառություն է կազմել միայն շինարարության ոլորտը։

«2026 թվականի հուլիսին, նախորդ տարվա նույն ժամանակահատվածի համեմատ, աճին զգալիորեն նպաստել են հետևյալ ոլորտները՝ արտադրությունը, տեղեկատվությունն ու կապը, ֆինանսներն ու ապահովագրությունը, հանքարդյունաբերությունը, ինչպես նաև տրանսպորտն ու պահեստավորումը։ Շինարարության ոլորտում գրանցվել է նվազման միտում», — ասվում է Ազգային վիճակագրական ծառայության նախնական զեկույցում։