Օգոստոսի 23-ին Վանաձորի «Հորովել» երգի և պարի ազգային համույթը ելույթ կունենա Ախալքալաքի Մշակույթի տանը։ Այս բացառիկ միջոցառումը տեղի բնակիչներին հնարավորություն կտա՝ առանց մեծ քաղաքներ մեկնելու, վայելել բարձրակարգ կատարումներ և եզակի պրեմիերաներ։ Jnews-ը առաջիկա համերգի կարևորության մասին զրուցել է միջոցառման կազմակերպիչներից մեկի՝ «Line Up» մշակութային կենտրոնի հիմնադիր և տնօրեն Ռադիկ Եզոյանի հետ։

Այս համերգը իսկական տոն է Ջավախքի մշակույթի գործիչների և արվեստի սիրահարների համար։ «Տիրուհիներ» և «Թումանյանի աշխարհը» պարային ներկայացումները ոչ միայն գեղեցիկ բեմադրություններ են, այլև կրթական ծրագիր, որը միաձուլում է պարարվեստն ու բեմական արվեստը՝ հայկական պատմության հետ։

«Տիրուհիներ» պարային ներկայացումը ոչ սովորական է ոչ միայն Ջավախքի, այլև ընդհանրապես հայ հանդիսատեսի համար, քանի որ այն պարզապես սովորական պար կամ ներկայացում չէ, այլ պարի և թատերական ներկայացման համադրություն։

«Line Up» մշակութային կենտրոնը երկար ժամանակ և մեծ ջանքերով աշխատել է, որպեսզի կարողանա Ախալքալաք հրավիրել խոշոր համույթների և նրանց ներկայացնել տեղի պարային խմբերին ու հանդիսատեսին։ Կենտրոնը վաղուց ձգտում է Ջավախքի պարարվեստը բարձրացնել նոր մակարդակի, այդ իսկ պատճառով իր առջև նպատակ է դրել Ախալքալաքում ներկայացնել բարձրակարգ արվեստ։ Սա պետք է խթանի հանդիսատեսին, պարողներին և նույնիսկ տեղական իշխանություններին՝ պահանջելու և ձգտելու արվեստի ավելի բարձր մակարդակի։

«Առաջին հերթին սա պարարվեստով զբաղվող խմբերի զարգացման հիմքն է։ Սա բարձր մակարդակ է, և այդ մակարդակը տեսնելով՝ մենք կսովորենք, կտեսնենք, թե ինչ աշխատանք է իրականացվել, և ինքներս էլ կցանկանանք նման աշխատանք կատարել։ Սա նաև հնարավորություն կտա մեր տեղական իշխանությունների ներկայացուցիչներին տեսնել բարձրակարգ արվեստ և պահանջել դա մեզանից։ Ինչո՞ւ Վանաձորում կա նման համույթ, իսկ մեզ մոտ՝ ոչ։ Մենք կարող ենք մասնագետներ հրավիրել, ինքներս գնալ մասնագիտական զարգացման ծրագրերի»։

Պետական համույթներին հրավիրելը հեշտ չի եղել, քանի որ ոչ բոլորն էին համաձայնում ելույթ ունենալ Մշակույթի տանը՝ անհրաժեշտ պայմանների բացակայության պատճառով։ Վեց ամիս շարունակ «Line Up»-ը՝ Ռադիկ Եզոյանի ղեկավարությամբ, աշխատել է այս ուղղությամբ, և այսօր ուրախությամբ հայտնում է, որ «Հորովել» համույթը կժամանի Ախալքալաք։ Սա մեծ ձեռքբերում է։

«Line Up»-ում նախատեսում են շարունակել բարձր դասի համույթներ, այդ թվում՝ վրացական պետական համույթներ հրավիրելու ավանդույթը։

Օգոստոսի 23-ին Մշակույթի տանը կայանալիք համերգը վճարովի է, տոմսի արժեքը 30 լարի է։ Այս խորհրդանշական վճարը կուղղվի միջոցառման կազմակերպչական ծախսերի՝ խմբի տեղափոխության և կեցության, Մշակույթի տան վարձակալության, համապատասխան բեմի, ձայնային և լուսային սարքավորումների ապահովման համար։ «Line Up»-ի առանձնահատուկ հպարտությունն է «Հորովել» համույթի՝ առանց հոնորարի ելույթ ունենալու փաստը։

«Սկզբնական նպատակը պարային խմբերի համար կրթական ծրագիր իրականացնելն էր, սակայն քանի որ կարողացանք այստեղ բերել բացառիկ պարային ներկայացում, այն հանդիսատեսի համար կլինի և՛ ուսուցողական, և՛ դիտարժան։ Այս համույթը հսկայական և անսովոր աշխատանք է իրականացրել։ Պարային ներկայացումը շատ ավելին է, քան պարզապես պար», — ասում է «Line Up» մշակութային կենտրոնի հիմնադիր-տնօրեն Ռադիկ Եզոյանը։

«Տիրուհիներ» պարային ներկայացումը «Հորովել» համույթի աննախադեպ աշխատանքն է։ Այն բեմադրվել է մի քանի ամիս առաջ, և ներկայումս ներկայացման պրեմիերաները շարունակվում են Հայաստանի տարբեր քաղաքներում և արտերկրում։ Օգոստոսի 23-ին Ախալքալաքում ներկայացումը նույնպես կկայանա որպես պրեմիերա, ինչը եզակի հնարավորություն է Ջավախքի հանդիսատեսի համար։

Տոմսերը կարելի է ձեռք բերել Trip Line-ի գրասենյակում՝ Ախալքալաք քաղաք, Թամար թագուհու փողոց 57 հասցեով։

Կարող եք նաև զանգահարել հետևյալ համարներով՝ +995 501 11 12 21 և +995 592 77 77 43։