Էներգետիկայի և ջրամատակարարման կարգավորման ազգային հանձնաժողովը (GNERC) ներկայացրել է հուլիսի 24-ի գիշերը Վրաստանի ողջ տարածքում էլեկտրաէներգիայի անջատման հետևանքով առաջացած համակարգային խափանման հետաքննության նախնական արդյունքները, հաղորդում է Առաջին ալիքը։

Կարգավորողի տվյալներով՝ ժամը 00:10-ին Վրաստանի էլեկտրացանցը հանկարծակի անջատվել է ադրբեջանական ցանցից, որի հետ այն գործում էր միացված եղանակով։ Մեկուսացված մնալով՝ ցանցը չի կարողացել հաղթահարել բեռը. հաճախականությունը և լարումը կտրուկ նվազել են, էլեկտրակայանները սկսել են զանգվածաբար անջատվել մեկը մյուսի հետևից, և երկիրը հայտնվել է բլեքաութի մեջ։

Հանձնաժողովն ընդգծել է, որ խափանումների շղթայի պատճառը կարող էր լինել «Էներգո-Պրո Ջորջիա»-ին պատկանող և «Քութաիսի 220» ենթակայանից սկիզբ առնող 110 կՎ լարման «Գեգութիի» էլեկտրահաղորդման գիծը։

Դրա հետ մեկտեղ, GNERC-ն որոշակի պատասխանատվություն է դրել նաև Վրաստանի պետական էլեկտրաէներգետիկ համակարգի վրա: Կարգավորողը հայտարարել է, որ օպերատորը պարտավոր է վերահաշվարկել ռելեային պաշտպանության և ավտոմատացման համակարգերի պարամետրերը՝ առանց գծերի լիարժեք վերազինմանը սպասելու, որպեսզի նվազագույնի հասցվի Ադրբեջանի էլեկտրացանցից ավտոմատ անջատման ռիսկը։

Հետաքննությունը շարունակվում է երկու ուղղությամբ. մասնագետները պարզում են անջատման պատճառն Ադրբեջանի հետ և ստուգում են վրացական համակարգի՝ մեկուսացված ռեժիմով կայուն աշխատելու ունակությունը։

Այս անջատումն առաջինն էր անցյալ շաբաթ երկիրը ցնցած խոշոր անջատումների շարքից։ Հաջորդ առավոտյան՝ հուլիսի 25-ին, Վրաստանը երկրորդ անգամ անընդմեջ ապրեց բլեքաութ. ժամը 8:00-ի սահմաններում շատ շրջաններ կրկին առանց էլեկտրաէներգիայի մնացին, Թբիլիսիի մետրոն անջատվեց, ջրամատակարարումը և ինտերնետային կապը խափանվեցին, և գնացքները կանգնեցվեցին ամբողջ երկրում: Էլեկտրաէներգիան վերականգնվեց միայն ժամը 10:30-ին։

Հուլիսի 24-ին GNERC-ը արտակարգ հետաքննություն սկսեց՝ անջատման պատճառը պարզելու համար։

Վրաստանի պետական անվտանգության ծառայությունը նույնպես հետաքննություն է սկսել՝ սաբոտաժի մեղադրեանքով։

Նյութը՝ apsny.ge-ից