Այս տարվա հունիսից սկսած՝ գործնական վարորդական քննության վերաբերյալ ուժի մեջ կմտնի էական փոփոխություն, որի համաձայն՝ երկուշաբթիից ուրբաթ կանցկացվեն միայն պլանային քննություններ, իսկ քաղաքացիները հնարավորություն կունենան շաբաթ օրերին հանձնել ոչ պլանային քննություններ։ Այս մասին հայտարարություն է տարածել Ներքին գործերի նախարարության սպասարկման գործակալությունը։
«Ներքին գործերի նախարարության սպասարկման գործակալությունը տեղեկացնում է, որ քաղաքացիների շահերը հաշվի առնելով և մատչելիությունը բարձրացնելու նպատակով՝ այս տարվա հունիսից կիրականացվի էական փոփոխություն գործնական վարորդական քննության վերաբերյալ։
Փոփոխությունից առաջ քաղաքացիները հնարավորություն ունեին երկուշաբթիից շաբաթ օրը հանձնել ինչպես պլանային, այնպես էլ ոչ պլանային (250 լարի) գործնական վարորդական քննություններ։ Փոփոխությունից հետո երկուշաբթիից ուրբաթ կանցկացվեն միայն պլանային քննություններ։ Քաղաքացիները հնարավորություն կունենան ոչ պլանային քննությունը հանձնել միայն շաբաթ օրը։
Այստեղ նշում ենք, որ ոչ պլանային քննությունների քվոտան ամբողջությամբ կավելացվի պլանային քննություններին», – նշվում է հայտարարության մեջ։
