Եվրոպական խորհրդարանի արտաքին գործերի հանձնաժողովն ընդունել է Վրաստանի վերաբերյալ զեկույցը։ Վրաստանի վերաբերյալ տարեկան զեկույցը ստացել է 53 Եվրախորհրդարանի անդամի աջակցությունը, 14-ը՝ դեմ է քվեարկել։
Զեկույցի նախագծի բացատրական քարտում նշվում է, որ սա Վրաստանի՝ որպես ԵՄ թեկնածու երկրի վերաբերյալ երկրորդ զեկույցն է, որը պատրաստվել է՝ հաշվի առնելով Եվրոպական հանձնաժողովի 2025 թվականի Վրաստանի վերաբերյալ զեկույցը։
«Զեկույցը կենտրոնանում է Եվրախորհրդարանի հիմնական մտահոգությունների վրա՝ Վրաստանում ժողովրդավարության վիճակի, օրենքի գերակայության և եվրոպական ինտեգրման վերաբերյալ», — նշվում է բացատրական քարտում։
Զեկույցի նախագծում նաև նշվում է, որ Եվրոպական խորհրդարանը լիակատար համերաշխություն է հայտնում վրաց ժողովրդին, «ով շարունակում է պայքարել եվրոպական և ժողովրդավարական Վրաստանի համար՝ ժողովրդավարական նահանջի, աճող ճնշումների, անդադար թշնամական հռետորաբանության, ապատեղեկատվության և սպառնալիքների ֆոնին»։
«Վրացական երազանքը ոչ միայն կասեցրել է, այլև իրականում փոխել է Վրաստանի եվրոպական ինտեգրման ընթացքը», — նշվում է զեկույցի նախագծում։
Նախագծում ընդգծվում է, որ ԵՄ-ի և նրա անդամ պետությունների կողմից Բիձինա Իվանիշվիլիի, «Վրացական երազանքի» հիմնական առաջնորդների, դատավորների, դատախազների և այլ պաշտոնյաների նկատմամբ կիրառված նպատակային անհատական պատժամիջոցները կարևոր են։
«Զեկույցի նախագծում ընդգծվում է, որ ԵՄ-ի և նրա անդամ պետությունների կողմից Բիձինա Իվանիշվիլիի, «Վրացական երազանքի» հիմնական առաջնորդների, դատավորների, դատախազների և Վրաստանում ժողովրդավարական հետընթացի, ընտրակեղծիքների, մարդու իրավունքների խախտումների և քաղաքական հակառակորդների ու ակտիվիստների հետապնդման համար պատասխանատու այլ պաշտոնյաների նկատմամբ կիրառված նպատակային անհատական պատժամիջոցները կարևոր գործիք են անպատժելիության դեմ պայքարում։ Ողջունում է այն փաստը, որ չնայած ԵՄ մակարդակով միաձայնության բացակայությանը, անդամ պետությունների աճող թիվը անհատական պատժամիջոցներ է կիրառում վրացի պաշտոնյաների նկատմամբ։ Կոչ է անում մյուս անդամ պետություններին հետևել նրանց օրինակին», — նշվում է զեկույցի նախագծում։
Փաստաթղթում նաև նշվում է, որ Եվրոպական խորհրդարանն ողջունում է ԵԱՀԿ-ի Մոսկվայի մեխանիզմի մեկնարկը, որը նախաձեռնվել է 24 պետությունների կողմից և թույլ է տալիս փորձագիտական առաքելություն ուղարկել՝ գնահատելու Վրաստանի կողմից ԵԱՀԿ պարտավորությունների կատարումը։
«Եվրոպական խորհրդարանը նշում է հանձնաժողովի առաջարկը՝ կասեցնել վրացական դիվանագիտական, ծառայողական և պաշտոնական անձնագրեր ունեցողների համար առանց վիզայի ճանապարհորդությունը ԵՄ բոլոր անդամ պետություններում՝ որպես «Վրացական երազանքի» ռեժիմի կողմից հիմնարար արժեքների խախտման ուղղակի հետևանք։ Ափսոսանք է հայտնում, որ ժողովրդավարական նահանջի և ճնշումների համար պատասխանատու վրացի պաշտոնյաների համար ԵՄ մակարդակով վիզայի արգելքի ներդրումը անհնար է դարձել Հունգարիայի և Սլովակիայի դիմադրության պատճառով։ Եվ զգուշացնում է, որ վրացական իշխանությունների շարունակական անգործությունը կարող է հանգեցնել ամբողջ բնակչության համար առանց վիզայի ճանապարհորդության կասեցմանը, որի համար «Վրացական երազանք» կուսակցությունը կկրի ամբողջ պատասխանատվությունը», — նշվում է նախագծում։
