Դեկտեմբերի 27-31-ը Վրաստանում սպասվում են պարբերաբար տեղումներ, հիմնականում ձյան տեսքով։ Այս մասին հայտնում է Վրաստանի Շրջակա միջավայրի ազգային գործակալությունը։

Օդերևութաբանների կանխատեսումների համաձայն՝ դեկտեմբերի 29-30-ը ծովում սպասվում է 4-6 բալ ուժգնությամբ փոթորիկ։

«Դեկտեմբերի 27-31-ը Վրաստանում սպասվում է ցուրտ և խոնավ օդային զանգվածների տարածում՝ տեղումներով, որոշ տեղերում առատ և հիմնականում ձյան տեսքով։ Հնարավոր է քամի, լեռնային շրջաններում՝ մառախուղ, ձնաբուք և ճանապարհների սառցակալում։

Դեկտեմբերի 29-30-ը ափամերձ շրջաններում հնարավոր են ամպրոպներ, ծովում՝ 4-6 բալ ուժգնությամբ փոթորիկներ, իսկ երկրի բարձրալեռնային շրջաններում՝ ձնահոսքի վտանգ», – ասվում է գործակալության հաղորդագրության մեջ։

Գործակալության տվյալներով՝ ճանապարհների որոշակի հատվածներում երթևեկությունը կարող է սահմանափակվել առատ ձյան, վատ տեսանելիության, ձնահոսքի, մերկասառույցի և ձնահոսքի վտանգի պատճառով։

«Սպասվող տեղումները կարող են զգալիորեն բարձրացնել ջրի մակարդակը Արևմտյան Վրաստանի գետերում (վտանգի մակարդակը՝ միջին)», – ասվում է գործակալության հայտարարության մեջ։