Քիշնև (Մոլդովա) քաղաքում տեղի ունեցավ Եվրոպայի մինչև 23 տարեկան ձյուդոյի առաջնությունը։ Սերբիան ներկայացնող Սոս Խաչատրյանը, ով ծնունդով Ախալքալաքից է, 73 կգ քաշային կարգում բրոնզե մեդալ է նվաճել։ Վրաստանը ներկայացնող Մաթե Բերուաշվիլին նույն կատեգորիայում արծաթե մեդալ է նվաճել։ Վրաստանի հավաքականը նաև առաջին տեղն է գրավել խառը թիմային պայքարում։
Ելույթ ունենալով 73 կգ քաշային կարգում՝ Խաչատրյանը հաղթանակ է տարել Մոլդովայի, Լատվիայի և Իտալիայի ներկայացուցիչների նկատմամբ, իսկ բրոնզե մեդալի համար գոտեմարտում՝ հունգարացի ձյուդոիստի։
Վճռորոշ մենամարտն ավարտվեց դրամատիկ. հայ մարզիկը վերջին վայրկյաններին խլեց հաղթական միավորը՝ ապահովելով իր տեղը պատվո հարթակում։
Այս կարգում ոսկե մեդալը նվաճել է ռումինացի Իոան Ձիտացը, արծաթը՝ վրացի Մաթե Բերուաշվիլին, իսկ բրոնզը՝ Պորտուգալիան ներկայացնող Օթարի Կվանտիձեն։
Եվրոպայի մինչև 23 տարեկանների ձյուդոյի առաջնությունում Վրաստանի հավաքականը խառը թիմային մրցումներում՝ եզրափակիչում 4-3 հաշվով հաղթել է Ֆրանսիայի հավաքականին՝ նվաճելով Եվրոպայի առաջնության երկրորդ տիտղոսը անընդմեջ։
Գիորգի Տերաշվիլին (73 կգ) անցկացրել է վճռորոշ մենամարտ՝ Վրաստանի հավաքականին բերելով ոսկե մեդալներ։
Վրաստանի հավաքականը Եվրոպայի առաջնությունում հանդես եկավ հետևյալ կազմով՝ Նինո Լոլաձե (57 կգ), Գիորգի Տերաշվիլի (73 կգ), Նինո Ծիկլաուրի (70 կգ), Գիորգի Ջաբնիաշվիլի (90 կգ), Լիզի Քվարցխավա (+70 կգ) և Շալվա Գուրեշիձե (+90 կգ):
