Եվրոպայի խորհուրդը և Եվրախորհրդարանը համաձայնության են եկել երրորդ երկրներ առանց վիզայի ճանապարհորդության կասեցման նոր կանոնների վերաբերյալ։ ԵԽ մամուլի հաղորդագրության մեջ նշվում է, որ թարմացված կանոնները թույլ կտան ԵՄ-ին ավելի արդյունավետ արձագանքել այն իրավիճակներում, երբ «առանց վիզայի ռեժիմը կիրառվում է անբարեխղճորեն կամ հակասում է Եվրոպական Միության շահերին»։
«ԵՄ-ի հետ առանց վիզայի ռեժիմն օգտակար է ինչպես երրորդ երկրների քաղաքացիների, այնպես էլ հենց Եվրամիության համար։ Սակայն, եթե այդ երկրների քաղաքացիները չարաշահեն այս արտոնությունը, ԵՄ-ն պետք է ունենա անհրաժեշտ գործիքները՝ հակազդելու համար։ Այս գործիքները կարող են ճնշում գործադրել այն երկրների վրա, որոնք խուսափում են անօրինական միգրացիայի դեմ պայքարում համագործակցությունից», — ասել է Լեհաստանի արտաքին գործերի նախարար Ռադոսլավ Սիկորսկին։
Մամուլի հաղորդագրության մեջ նշվում է, որ Եվրոպական խորհուրդը և Եվրախորհրդարանը համաձայնության են եկել այն պատճառների շուրջ, որոնք կարող են հիմք հանդիսանալ ԵՄ-ի հետ առանց վիզայի ռեժիմի կասեցման մեխանիզմի ակտիվացման համար։ Դրանց թվում անվանակոչված են.
Երրորդ երկրի վիզային քաղաքականության անհամապատասխանությունը ԵՄ վիզային քաղաքականության հետ, մասնավորապես այն դեպքում, երբ այդ երկրի աշխարհագրական սերտությունը ԵՄ-ին կարող է նպաստել ԵՄ անօրինական մուտք գործող երրորդ երկրների քաղաքացիների հոսքի աճին։
Քաղաքացիություն շնորհելու ներդրումային ծրագիրը, որը քաղաքացիություն է տրամադրում երկրի հետ իրական կապ չունեցող անձանց՝ նախապես որոշված վճարման կամ ներդրման հիման վրա։
Հիբրիդային սպառնալիքներ, անվտանգային փաստաթղթերի և ընթացակարգերի թերություններ, ինչպես նաև օրենսդրության բացեր։
Արտաքին քաղաքականության հարաբերությունների վատթարացում երրորդ երկրի հետ, հատկապես մարդու իրավունքներին, հիմնարար ազատություններին և ՄԱԿ-ի կանոնադրության լուրջ խախտումներին վերաբերող դեպքերում։
Նշվում է նաև, որ այս նոր հիմքերը կլինեն լրացում՝ առանց վիզայի ռեժիմի կասեցման առկա պատճառներին, ինչպիսիք են՝ ցածր հաստատման մակարդակ ունեցող որոշակի երկրներից ապաստան հայցողների թվի աճը, մուտքը մերժված երրորդ երկրների քաղաքացիների թվի աճը կամ ԵՄ-ում իրենց մնալու ժամկետից ավելի երկար մնալը։
Բացի այդ, մամուլի հաղորդագրության մեջ նշվում է, որ Եվրոպայի խորհուրդը և Եվրոպական խորհրդարանը ձգտում են առանց վիզայի ճանապարհորդության մեխանիզմը 9 ամսից երկարաձգել մինչև 12 ամիս՝ այն ևս 24 ամսով երկարաձգելու հնարավորությամբ (ներկայիս 18 ամսվա փոխարեն):
Մեխանիզմի երկարաձգված ժամկետը թույլ կտա ԵՄ-ին երկխոսություն սկսել երրորդ երկրի հետ՝ վերացնելու այն պատճառները, որոնք հանգեցրել են առանց վիզայի ռեժիմի կասեցմանը։ Նաև ընդգծվում է, որ ԵՄ-ն կկարողանա ամբողջությամբ չեղարկել առանց վիզայի ռեժիմը, եթե երկիրը չվերացնի համապատասխան խախտումները։
Ըստ մամուլի հաղորդագրության՝ Եվրոպայի խորհուրդը և Եվրոպական խորհրդարանը նաև համաձայնության են եկել կատարելագործել առանց վիզայի ռեժիմի ժամանակավոր կասեցման մեխանիզմը, որպեսզի այն կիրառվի միայն հիմնարար իրավունքների և արտաքին քաղաքականության պարտավորությունների խախտումների համար պատասխանատու անձանց նկատմամբ։
«Գործող համակարգի համաձայն՝ առանց վիզայի ճանապարհորդության կասեցման մեխանիզմի երկրորդ փուլը վերաբերում է բոլոր քաղաքացիներին, ինչը կարող է անհամաչափ լինել այն դեպքերում, երբ իրավիճակի համար պատասխանատու է կառավարությունը։ Նոր կանոնների համաձայն՝ լրացուցիչ 24-ամսյա առանց վիզայի ճանապարհորդության սահմանափակումն ավտոմատ կերպով չի կիրառվի երրորդ երկրի ամբողջ բնակչության վրա։ Դրա փոխարեն, ԵՄ-ն կկարողանա որոշում կայացնել՝ կասեցնել առանց վիզայի ռեժիմը պետական պաշտոնյաների և դիվանագետների համար», — ասվում է մամուլի հաղորդագրության մեջ։
