Ախալքալաքի թիվ 2 հանրակրթական դպրոցում բացվել է քիմիայի նոր կաբինետ։ Այն բացվել է դպրոցի նախկին աշակերտ, բարերար Վարդան Ավագյանի ֆինանսական աջակցությամբ։ Սա առաջին կաբինետը չէ, որ բացվել է այս դպրոցում նրա ֆինանսավորմամբ։
Ապրիլի 1-ին, Ախալքալաքի թիվ 2 հանրակրթական դպրոցում բացվել է քիմիայի նոր կաբինետ, որի վերանորոգումն ու սարքավորումների ձեռքբերումն իրականացվել է դպրոցի 1985 թ.-ի շրջանավարտ Վարդան Ավագյանի ֆինանսական աջակցությամբ։
Կաբինետի բացմանը ներկա էին Ախալքալաքի փոխքաղաքապետեր՝ Թեյմուրազ Մչեդլիձեն և Մկրտիչ Մղդեսյանը, սակրեբուլոյի պատգամավորներ, Ախալքալաքի կրթական ռեսուրս կենտրոնի տնօրեն Թերեզա Չիվչյանը և բարերարի դասընկերները։ Դպրոցի տնօրենի խոսքով՝ ամեն տարի բարերարը ֆինանսավորում է ինչ-որ օգտակար և անհրաժեշտ գործ՝ դպրոցի և աշակերտների զարգացման համար։
Նախկինում նրա շնորհիվ բացվել էր աշխարհագրության կահավորված կաբինետ, ինչպես նաև մի քանի տարի շարունակ նա համակարգիչներով է պարգևատրում դպրոցի լավագույն աշակերտներին՝ խրախուսելու նրանց բարձր առաջադիմությունը։
«Մենք բազմաֆունկցիոնալ տախտակով քիմիայի կաբինետ են բացում։ 2023 թվականին Վարդան Նահապետովիչը ֆինանսավորել է աշխարհագրության կաբինետ՝ նույնպես ժամանակակից սարքավորումներով։ Այս երկու տարվա ընթացքում մենք այնքան օգուտ ենք ստացել այս կաբինետից, քանի որ այնտեղ ոչ միայն աշխարհագրության դասեր են անցկացվում, այլ բոլոր առարկաների, եթե կա արդյունք, եթե անհրաժեշտություն կա օգտագործելու ինտերակտիվ գրատախտակ մեր աշակերտներին ու ուսուցիչներին տրամադրվում է աշխարհագրության կաբինետ՝ որակյալ դասեր անցկացնելու համար», – ասաց Ախալքալաքի թիվ 2-րդ դպրոցի տնօրեն Անահիտ Աբգարյանը։
Դպրոցի տնօրենի խոսքով՝ քիմիայի կաբինետը կօգնի հանրահռչակել բնական գիտությունները, որոնք վերջին տասնամյակներում կորցրել են իրենց արդիականությունն ու պահանջարկը դիմորդների շրջանում։
«Ամեն տարի նա հետաքրքրվում է, թե ինչ կարիքներ ունենք, մանկավարժական կոլեկտիվի հետ քննարկում ենք, բացում ենք այն կաբինետները, որոնք անհրաժեշտ են մեր աշակերտներին։ Բնական գիտությունների ուսուցումը մեր երկրի կրթական համակարգի լուրջ խնդիրներից ու թույլ կողմերից է։ Դա հաստատում են բազմաթիվ միջազգային հետազոտություններ, որոնք անցկացվում են պարբերաբար։ Ամեն տարի ազգային քննությունների արդյունքները ցույց են տալիս, որ դիմորդները դժվարությամբ են հանձնում բնագիտական առարկաները: Օրինակ՝ 2023 թվականին դիմորդների 31%-ը չի հաղթահարել ֆիզիկայի քննությունների նվազագույն շեմը, իսկ քիմիայի՝ 20%-ը։ Համաձայն ազգային ուսումնական պլանի՝ առաջնահերթ են բնագիտական առարկաները (քիմիա, կենսաբանություն, ֆիզիկա)։ Բայց քննությունների արդյունքները ցույց են տալիս, որ այս առարկաների նկատմամբ հետաքրքրությունը շատ ու շատ ցածր է։ Ցավոք սրտի, ուսուցիչների քննությունների արդյունքները նույնպես հիասթափեցնող են։ Իսկ Վարդան Նահապետովիչի այս շքեղ նվերը մեզ հույս է ներշնչում, որ որակյալ ուսուցումը կմեծացնի հետաքրքրությունն ու մոտիվացիան քիմիա սովորելու նկատմամբ»,- ասաց Անահիտ Աբգարյանը։
Կաբինետի սարքավորումները ցուցադրելու համար քիմիայի ուսուցիչները դպրոցի ներկա հյուրերի համար մի քանի հետաքրքիր քիմիական փորձ կատարեցին։ Ուսուցիչները և ներկաները կարծիք հայտնեցին, որ նման փորձերը կմեծացնեն աշակերտների հետաքրքրությունը այնպիսի բազմակողմանի և հետաքրքիր առարկայի նկատմամբ, ինչպիսին քիմիան է։
Վարդան Ավագյանն ավարտել է թիվ 2 հանրակրթական դպրոցը (այն ժամանակ՝ ռուսական, Մայակովսկու անվան միջնակարգ դպրոցը) ոսկե մեդալով։ Այնուհետեւ գերազանցությամբ ավարտել է Ի.Մ. Սեչենովի անվան Մոսկվայի բժշկական ակադեմիան՝ ստանալով բժշկական գիտությունների թեկնածուի գիտական աստիճան։ Ավարտել է նաև ՌԴ ԱԳՆ դիվանագիտական ակադեմիան՝ Համաշխարհային տնտեսության, Մոսկվայի պետական շինարարական համալսարանի և ԱՄՆ-ի Սթենֆորդի համալսարանի Բիզնեսի ավարտական դպրոցում: Երկար տարիներ աշխատել է Ի.Մ. Սեչենովի անվան Մոսկվայի բժշկական ակադեմիայի վիրաբուժության ամբիոնում որպես վիրաբույժ և ուսուցիչ։ Նրա հետագա կարիերան զարգացավ առաջատար պաշտոններում խոշոր միջազգային և ռուսական ընկերություններում, մասնավորապես ամերիկյան Otis կոնցեռնում և եվրոպական խոշորագույն վերելակային ընկերություններից մեկում՝ Moslift-ում:
