Հայաստանի Կենտրոնական ընտրական հանձնաժողովի փոխանցմամբ, ամփոփվել են Գյումրու 82 ընտրատեղամասերից 81-ի արդյունքները։
Որևէ քաղաքական ուժ չի կարողացել հավաքել 50+1 տոկոս՝ իշխանություն ձևավորելու համար։
«Քաղաքացիական պայմանագիր» կուսակցության թեկնածու Սարիկ Մինասյանը ստացել է 16 հազար 938 քվե, ձայների 36.21 տոկոսը, Հայաստանի կոմունիստական կուսակցության թեկնածու Վարդան Ղուկասյանը՝ 9 հազար 537 քվե, ձայների 20.5 տոկոսը, «Մայր Հայաստան» կուսակցությունների դաշինքի թեկնածու Կարեն Սիմոնյան՝ 2 հազար 844 քվե, ձայների 6.11 տոկոսը, «Մեր քաղաքը» կուսակցությունների դաշինքի թեկնածու Մարտուն Գրիգորյանը՝ 7 հազար 296 քվե, ձայների՝ 15.5 տոկոսը, «Իմ հզոր համայնք» կուսակցության թեկնածու Ռուբեն Մխիթարյանը՝ 3 հազար 659 քվե, ձայների 8.8 տոկոսը, «Ապրելու երկիր» կուսակցությունը՝ 1 658 քվե, Հայաստանի աշխատավորական սոցիալիստական կուսակցությունը՝ 642 քվե, «Եվրադաշինք» կուսակցությունների դաշինքը՝ 2 հազար 71 քվե, «Դեմոկրատական այլընտրանք» կուսակցությունը՝ 1 387 քվե։
Անճշտությունների գումարային չափը 172 է, անվավեր քվեաթերթիկների թիվը՝ 613:
Ընդդիմադիր երկու ուժերը՝ «Իմ հզոր համայնք» կուսակցության թեկնածու Ռուբեն Մխիթարյանն ու «Մայր Հայաստան» կուսակցությունների դաշինքի թեկնածու Կարեն Սիմոնյանն արդեն հայտարարել են, որ կմիանան երկրորդ տեղը զբաղեցնող ընդդիմադիր թեկնածու Վարդան Ղուկասյանին։
«Պատրաստ եմ մեր ավագանիների կազմով առանց որևէ նախապայմանի, առանց որևէ պաշտոնի հավակնելու քվեարկել գյումրեցիների կողմից առավելագույն ձայներ ստացած քաղաքապետի ընդդիմադիր թեկնածու Վարդան Ղուկասյանի օգտին», – Ֆեյսբուքում գրել է Մխիթարյանը։
Կարեն Սիմոնյանն էլ նշել է, որ իրենց յուրաքանչյուր գործողություն միտված է լինելու որպեսզի «իշխանազրկեն «Քաղաքացիական պայմանագրին»։
